УИХ-ын гишүүд НӨАТ-ыг 5% болгох хуулийн төсөл санаачилснаа танилцууллаа

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын гишүүн Б.Пүрэвдорж, Ч.Лодойсамбуу, А.Ундраа, Г.Уянгахишиг нар Нэмэгдсэн өртгийн албан татвар /НӨАТ/-ыг таван хувь болгох тухай хуулийн төсөл санаачилсан талаараа мэдээлэл хийлээ.

УИХ-ын гишүүн Б.Пүрэвдорж: Бид дөрвөн гишүүн НӨАТ-ын хувь хэмжээг таван хувь болгох хуулийн төслийг өргөн барьсан. Энэ хуулийн төслийг өмнө нь 2019 онд өргөн барьсан боловч хэлэлцэхгүй байсаар байгаад буцаагдсан. Шинэ парламент бүрдсэнээр шинэ гишүүдтэй хамтраад дахин өргөн барих гэж байна.

Өнөөдрийн байдлаар 180 мянга орчим аж ахуйн нэгж бий. Үүний 80 орчим мянга нь НӨАТ төлөгчөөр бүртгүүлсэн. 250 мянган хувиараа хөдөлмөр эрхэлдэг хүний 50 мянга нь НӨАТ төлөгчөөр бүртгүүлсэн байна. Өнөөдрийг хүртэл энэ тоо яагаад ийм бага байна гэхээр НӨАТ-ын хувь хэмжээ хэтэрхий өндөр байгаатай холбоотой.

2024 оны байдлаар НӨАТ нь нийт татварын 24 хувийг бүрдүүлж байгаа. Хэрэв өнгөрсөн жил НӨАТ-ыг таван хувь болгосон бол 3.8 их наядаар НӨАТ багасна гэж шууд тооцож болохгүй. Татварын орлого багасах нь эргээд татварын бааз суурь нэмэгдэх юм. Хувиараа хөдөлмөр эрхэлдэг НӨАТ төлөгч 50 мянган иргэн 150 мянга болж нэмэгдэх магадлалтай. Үүний дүнд татварын орлого багасахгүй, бусад татварын орлогыг нэмэгдүүлэх боломжийг бий болгох юм.

УИХ-ын гишүүн А.Ундраа: НӨАТ-ыг бууруулах нь эдийн засгийг ил тод болгох, албан эдийн засгийн дэмжих ач холбогдолтой юм. Хамгийн гол нь татвар төлөгчдийн нуруун дээр ирж байгаа дарамтыг бууруулах, бизнес эрхлэг орчныг сайжруулах ач холбогдолтой учраас энэ хуулийн төслийг дэмжиж, хамтран санаачилж байна.

УИХ-ын гишүүн Г.Уянгахишиг: Манай нам аж ахуй эрхлэгчдэд очиж байгаа татварын дарамтыг бууруулах мөрийн хөтөлбөртэйгөөр сонгуульд оролцсон. Нэмэгдсэн өртгийн албан татвар эцсийн бүтээгдэхүүнд нөлөөлдөг. Нөгөө талаар жижиг, дунд аж ахуй эрхлэгчдэд нэлээн том дарамт болдог.

НӨАТ-ын 10 хувийг 5 хувь болгосноор аж ахуй эрхлэгчдээ дэмжинэ, иргэдэд очиж байгаа татварын дарамтыг бууруулж, бүтээгдэхүүний үнийг бууруулах ач холбогдолтой юм.

УИХ-ын гишүүн Ч.Лодойсамбуу: Энэ хуулийн төслийг өнгөрсөн хугацаанд эрх баригчид дэмжээгүй. Олон шалтгааны улмаас энэ хууль батлагдаагүй өнөөдрийг хүрсэн.

Одоо болж байгаа жагсаалаар иргэд татварын дарамтаа боль, бизнес эрхлэх боломжгүй байна, өрхийн амьжиргаа сүйрлээ гэж шаардаж байгаа.

Бид хуулиа батлуулахын төлөө ажиллана. Бусад гишүүд маань ч дэмжих байх.