Бурхны хөшөөтэй “бэлгийн харилцаанд орж” саваагүйтсэн жуулчныг Италийн эрх баригчид эрэн сурвалжилж байна

Өнгөрсөн амралтын өдөр нэгэн жуулчин эмэгтэй Флоренс хот дахь Бахус бурхны хөшөөтэй зүй бусаар харьцаж, энэ үйлдлийнхээ зураг, бичлэгийг сошиал орчинд тараажээ.

Бахус бол эртний Ромын дарс, дур хүслийн бурхан юм.

Италийн соёлын яам, Флоренс хотын захиргаа уг эмэгтэйг шийтгэхээр эрэн сурвалжилж эхэлсэн байна.

Хотын албаныхан уг эмэгтэйг хараахан олоогүй байгаа бөгөөд ёс бус үйлдэл гаргах үедээ согтуу байсан байх магадлалтайг өчигдөр мэдээлжээ.

Хэрвээ баригдвал Италийн соёлын өвийг хамгаалах хуулийн дагуу мөнгөн торгуулиар шийтгүүлж, бүх насаараа Флоренс хотод хөл тавих эрхгүй болох магадлалтай гэнэ.

Бахусын хөшөө нь 16 дугаар зууны уран барималч Жамболонягийн эх бүтээлийн хуулбар юм байна.

Микеланжелогийн уран бүтээлүүдийг шүтэж, эртний Грекийн хөшөө баримал урлах арга барилыг дагадаг Жамболоня 1552 онд Флоренс хотод суурьшиж байжээ.

Түүний бүтээл одоо Флоренс хотын төвд оршдог Баргелло музейд хадгалагддаг ба хуулбар нь Понте Веккио гүүрний ойролцоо гудамжинд байрладаг байна.

Ер нь гадаадын жуулчдын зүй зохисгүй үйлдэл, ааш авир сүүлийн жилүүдэд Италийн эрх баригчдын тэвчээрийг барж байгаа.

2022 онд Ромын алдарт Испани шатаар Масерати загварын автомашинтай давхисан эрэгтэй шийтгүүлж байжээ. Тухайн онд бас нэг жуулчин Венецийн Их сувагт сёрфингээр зугаацаад торгуулсан юм.

Эх сурвалж: CNN