Клод Имовэн: Францын компаниудын хувьд Монгол Улсад хөрөнгө оруулахад тогтвортой байдал, бизнест ээлтэй хөрөнгө оруулалтын орчин хамгаас чухал

 

Парис хотноо Монгол, Францын бизнес уулзалт болж, хоёр улсын 100 гаруй бизнес эрхлэгч ААН, иргэн оролцсон юм.

Уулзалтын дараа "Орано" группийн ТУЗ-ийн дарга Клод Имовэн "Франц-Монголын бизнесийн зөвлөлийн Ерөнхийлөгч “Франц-Монголын бизнесийн зөвлөлийн Ерөнхийлөгчийн хувьд Монгол Улсын Ерөнхийлөгч Франц Улсад түүхэн айлчлал хийж буйд баяртай байна.

Айлчлалын хүрээнд бизнес форумыг зохион байгуулах болсныг бизнесүүд талархан хүлээн авсан. Бизнес форумд 70 гаруй компанийн төлөөлөл оролцож байгаа. Хоёр улсын эдийн засгийн хамтын ажиллагаанд уул уурхайн салбар түлхүү эзэлж ирсэн.

Харин өнөөдрийн бизнес форумд тээвэр, агаарын орон зай, аялал жуулчлал, хөдөө аж ахуй, үйлчилгээ зэрэг салбарт амжилттай үйл ажиллагаа явуулж буй Францын шилдэг, томоохон компаниуд оролцож байна.

Харилцаа, хамтын ажиллагааг гүнзгийрүүлэн хөгжүүлэхэд хоёр улсын Ерөнхийлөгчийн түвшинд санал нэгдэж байгаа нь маш чухал. Францын компаниудын хувьд Монгол Улсад хөрөнгө оруулахад тогтвортой байдал, бизнест ээлтэй хөрөнгө оруулалтын орчин, алсын хараа хамгаас чухал.

Монгол Улсын Ерөнхийлөгч, төр, засгийн өндөр түвшний төлөөлөгчид форумд оролцож буй нь тууштай хамтран ажиллах эрмэлзлийн илэрхийлэл болж байна. Франц компаниуд барууны орнуудад хөрөнгө оруулж, хамтран ажилладаг туршлага арвин.

Монгол Улсад хөрөнгө оруулалт хийхдээ бусад орны адилаар хууль, эрх зүйн орчин тодорхой байх, нээлттэй бизнес эрхлэх боломжийг бүрдүүлэх зэрэг нөхцөлийг хүлээх болов уу. Би хувьдаа тийм нөхцөл бүрдсэн гэж харж байна" хэмээн байр сууриа илэрхийллээ.

Өнөөдөр Монгол, Франц улсын Ерөнхийлөгч нар албан ёсны уулзалт хийж, баримт бичигт гарын үсэг зурах ёслолын ажиллагаанд оролцох хөтөлбөртэй байна.

 

ЕТГ

 

ЕТГ

 

ЕТГ