"Морин хуурын чуулгын тоглолтыг Францын Версалийн ордонд үзсэн нь гайхамшигтай байлаа"

Франц улсын Версалийн ордны Хааны дуурийн театрт Монгол Улсын соёлын элч, Улсын филармонийн морин хуурын чуулгын тоглолт эгшиглэлээ.

Монгол аялгуу, Уяхан замба тивийн наран, Уулс туульс, Сэтгэлийн эгшиг, Уужмын зүүд, их хааны аравт, Чингисийн эр хоёр загал, Кармен сюит, Турандот дуурийн Нессүн Дорма, Нутаг минь хүлэг минь зэрэг 20 орчим уран бүтээлээ Франц улсын төрийн өндөр түвшний төлөөлөгчид, Парис хотын дарга, парламентын гишүүд, тус улсад байгаа монгол иргэдэд толилуулав.

Тоглолтын дараа зарим үзэгч сэтгэгдлээ илэрхийлсэн юм.

Легионы армийн төлөөлөл:

Морин хуурын чуулгын тоглолтоос "Сэрсэн тал"-ыг сонсоод нутагтаа очсон юм шиг сайхан санагдлаа. Бид 2006 оноос хойш Францад байгаа ч жил бүр нутагтаа очдог. Бид Ерөнхийлөгчтэй уулзсан, маш сайхан хүлээж авлаа.

Франц улсад амьдардаг монгол иргэн:

Францад ирээд 23 жил болж байна. Сэтгэл хөдөлгөсөн сайхан тоглолт байлаа, монголоороо бахархаж байна. Францчууд морин хуурын тоглолтыг биширч байна. Түүхт Версилийн ордонд Монголын морин хуурын тоглолт эгшиглүүлсэн нь нэр хүндийн асуудал. 

Франц улсад амьдардаг монгол иргэн:

Олон жил үзээгүй морин хуурын чуулгын тоглолтыг Францын Версалийн ордонд үзсэн нь гайхамшигтай байлаа. Уран бүтээлчдийн хувцаслалт гоё болсон байна. Морь минь аялгуу огшоолоо. Монгол иргэн Морин хуурын чуулгын тоглолтыг үзэхэд сэтгэл их хөдөллөө. Гадаадын зохиолуудыг морин хуур хөгжмөөр тоглож байгаа нь гайхалтай. Хийл хөгжмөөс дутахгүй байна, сэтгэл хөдөллөө. Ятгын, морин хуурын гоцлол гайхалтай байлаа.

Морин хуурын чуулга 2022 оны арванхоёрдугаар сард Токио хотын NHK Hall-д, 2023 оны есдүгээр сард Австрали улсын Сиднейн Дуурийн театрт анх удаа бүрэн хэмжээний тоглолтоо хийсэн юм.