Ерөнхийлөгч У.Хүрэлсүх Парис хотын Засаг дарга Анн Идалго нар түгжрэл, агаарын бохирдол зэрэг асуудлаар санал солилцов

Монгол Улсын Ерөнхийлөгч Ухнаагийн Хүрэлсүхэд Бүгд Найрамдах Франц Улсын нийслэл Парис хотын Засаг дарга Анн Идалго 2023 оны аравдугаар сарын 11-ний өдөр бараалхав.

Уулзалтын үеэр талууд хот төлөвлөлт, авто замын түгжрэл, агаарын бохирдол, ногоон байгууламж зэрэг асуудлаар санал солилцлоо.

 

Монгол Улсын Ерөнхийлөгч У.Хүрэлсүх нийслэлийн иргэдийн тав тухтай, аюулгүй аж төрөхөд сөргөөр нөлөөлж буй бэрхшээлийг шийдсэн туршлагаасаа хуваалцахын чухлыг онцолж, энэ чиглэлээрх хоёр нийслэлийн хамтын ажиллагаанд дэмжлэг үзүүлэхээ илэрхийлсэн юм.

 

Монгол Улсын Ерөнхийлөгч хүн төрөлхтний эв нэгдлийн бэлгэ тэмдэг зуны олимпын 33 дугаар наадам “Парис – 2024”-ийг зохион байгуулах хүндтэй үүргээ нэр төртэйгөөр биелүүлнэ гэдэгт итгэлтэй байгаагаа илэрхийлж, хотын дарга Анн Идалго-д амжилт хүсэв гэж Ерөнхийлөгчийн Тамгын Газраас мэдээллээ.