СУДАЛГАА: Ахмад хүн архи, согтууруулах ундаа хэтрүүлэн хэрэглэх нь залуусын дургүйцлийг хамгийн их хүргэдэг

 

Гэрэл зургийг MPA агентлагийн онцгой зөвшөөрөлтэйгөөр ашиглав

“Мэдлэгийн хотхон” НҮТББ-аас "Ахмад настны нийгэм, улс төрийн оролцоо" сэдэвт судалгааны үр дүнг өчигдөр танилцуулсан юм. 

Энэхүү судалгаанд 500 гаруй ахмад настан, 500 гаруй залууг тэгш хамруулахыг зорьсон гэдгийг судлаач Г.Наранбаяр хэлж байв.

Тухайлбал, ахмад хүн олон нийтийн газар дараах байдлаар биеэ авч явж байгаатай таарвал аль нь таны дургүйг хүргэх вэ? гэх асуумж судалгааг авсан байна. 

Судалгаанд хамрагдсан залуусын дийлэнх нь ахмад хүмүүс архи, согтууруулах ундаа хэтрүүлэн хэрэглэх нь таагүй сэтгэгдэл төрүүлдэг хэмээн хариулжээ. 

График. Ахмад настнуудын талаарх залуусын санал

Энэ талаар "Ахмадууд архи, согтууруулах ундаа хэтрүүлэн хэрэглэсэн байхыг харах нь залуусын дургүйцлийг хамгийн их төрүүлдэг нь судалгааны үр дүнгээс харагдаж байна. Харамсалтай нь өнөөдөр согтууруулах ундааг хэтрүүлэн хэрэглэх нь манай нийгэмд түгээмэл үзэгдэл болоод байгаа. 

Түүнчлэн тэтгэвэрт гарсны дараа эрэгтэйчүүд гол төлөв хоёр жилийн хугацаанд архидан согтуурах явдал түгээмэл байна. Гэхдээ залуучууд архидалтад маш ихээр шүүмжлэлтэй хандаж байгаа нь манай ирээдүй хойч үе асуудлыг зөвөөр шүүн тунгаах болсны нэгэн илрэл.

Үүнээс гадна өөрт хамааралгүй зүйлд оролцож, аль нэг намын эрх ашгийг мухар сохроор өмгөөлөн хамгаалдаг гэх хандлага тэдний дунд түгээмэл байгаа нь үнэн гэж хариулсан" хэмээн Ахмад настны нийгэм, улс төрийн оролцоо судалгааны тайланд дурджээ.