О.Батбаяр: Вакцины III тун хийлгэсэн иргэдийн тоо хүн амын 30 хувьд хүрвэл шинээр илрэх тохиолдлын тоо буурна
Манай улсад коронавирусийн эсрэг вакцины гурав дахь тунг хийж эхлээд байгаа.
Эрүүл мэндийн яам болон холбогдох байгууллагуудаас гурав дахь тунг хийлгэхийг уриалсаар байгаа ч иргэд эсрэг тэсрэг байр суурьтай хэвээр байгаа юм. Иймд УОК-ын Эрдэмтдийн зөвлөлийн Нарийн бичгийн дарга О.Батбаяр гурав дахь тунтай холбоотой судалгааны үр дүнгээс ийнхүү мэдээлэв.
Тэрбээр "Дельта хувилбартай тэмцэх гол стратеги бол вакцины гурав дахь тун. Үүнд хамрагдсан иргэдийн тоо одоогоор хүн амын есөн хувьтай тэнцэж байна. Хэрэв 30 орчим хувь руу орвол шинээр бүртгэгдэх халдварын тоо багадаа хоёр дахин буурах тооцооллыг улс орнууд хийж байна. Иймд тохиолдлын тоог бууруулах хамгийн хурдан бөгөөд үр дүнтэй арга нь вакцины гурав дахь тунд хамрагдсан хүний тоог есөн хувиас 30 хувьд хүргэх зайлшгүй шаардлага бий" гэсэн юм.
Түүнчлэн УОК-ын Эрдэмтдийн зөвлөлийн Нарийн бичгийн дарга О.Батбаяр дельта хувилбар халдварлах чадвар өндөртэй тул гэрээсээ өөр орчинд амны хаалтаа тогтмол зүүж байхыг зөвлөлөө.
Коронавирусийн эсрэг вакцины гурав дахь тунг хийлгээд 14 хоносон 297,000 иргэнд тандалт хийж үзэхэд 99.9 хувь нь халдварт өртөөгүй байгаа бол халдвар авсан 0.1 хувь нь хөнгөн өвчилсөн байна. Энэ нь гурав дахь тун үр дүнтэй байгааг нотолж байна хэмээн албаны хүн хэллээ.
ВИДЕО:
