Ч.Хүрэлбаатар: Коронавирусийн эсрэг вакцин үйлдвэрлэгчидтэй гэрээ хэлцэл хийж байна
Монгол Улсын Засгийн газрын өнөөдрийн хуралдаанаар айл өрх, зарим аж ахуйн нэгжийн ус, дулаан, цахилгааны төлбөрийг тэглэж, төр хариуцахаар шийдвэрлэлээ.
Уг шийдвэрийг Ерөнхий сайд У.Хүрэлсүх танилцуулсны дараагаар сэтгүүлчдийн асуултад холбогдох албаныхан хариулт өгч байна. Энэ үеэр вакцин авах асуудал ямар шатанд байгаа тодруулахад Сангийн сайд Ч.Хүрэлбаатар "Ерөнхий сайдын захирамжаар гарсан ажлын хэсэг эрчимтэй ажиллаж байна. Гурван чиглэлээр ажиллаж байна.
Нэгдүгээрт, олон улсын байгууллагуудтай харилцаж байгаа. Үүний нэг нь COVAX хөтөлбөр, Дэлхийн банк, Азийн хөгжлийн банк зэрэг банк, санхүүгийн байгууллагуудтай гэрээ хэлцэл хийж байна.
Хоёрдугаарт, улс орнуудтай вакцины чиглэлээр хамтран ажиллаж байна.
Гуравдугаарт, вакцин бүтээгчидтэй холбогдож, гэрээ хэлцэл хийж байгаа. Одоогоор вакцин илүү дэлгэрэнгүй мэдээлэл өгөх боломжгүй байна.
Бид вакцинжуулах эрэмбэлэн ангилалтыг хийсэн. Тухайлбал, эхний ээлжид эмч, эмнэлгийн ажилтнууд, архаг хууч өвчтэй хүмүүс, онцгой, хил гааль, цагдаа зэрэг цар тахалтай нүүр тулан ажиллаж буй алба хаагчид, 55-аас дээш насныхныг дархлаажуулна. Түүнчлэн эдийн засгийн суурь салбарын ажилтнуудыг дархлаажуулах юм. Гэрээ хэлцэл ид хийгдэж байгаа. Эцэслэгдсэний дараа та бүхэнд мэдээлнэ" гэлээ.
Сангийн сайд Ч.Хүрэлбаатар "2020, 2021 оны Улсын төсөвт вакцин авахад зориулан 51 тэрбум төгрөг тусгасан. Мөн Эрүүл мэндийн даатгалын санд эрсдэлийн сан бий.
Ажлын хэсгийнхэн вакциныг яаж хурдан хугацаанд Монголд оруулж ирэх арга замыг сонгож байгаа. Энэ хүрээнд COVAX хөтөлбөрийн санаачлагчдын нэгээс санхүүжилт авахаар ажиллаж байна. COVAX хөтөлбөрийн хүрээнд улс орнууд вакциныг худалдан авна. Үүнд манай улс оролцвол вакцин авах хугацаа наашлах боломжтой" хэмээв.
ВИДЕО:
