"Зургаадугаар сарын 20-нд Зүүн Өмнөд Ази руу нислэг үйлдэх боломжийг судалж байгаа"

Гэрэл зургийг mpa.mn

Улсын Онцгой комисс өнөөдөр хуралдаж, таван асуудал хэлэлцсэний нэг нь гадаад улсаас иргэдээ татан авах тусгай үүргийн нислэгүүдийн талаар байв.

Зургаадугаар сард нийт найман нислэг хийхээр төлөвлөж байгаа талаар УОК-ын Шуурхай штабаас танилцуулж байсан бол нислэгийн тоо нэгээр нэмэгдэж, есөн удаагийн нислэгээр 2,300 иргэнээ татан авах болсон талаар УОК-ын тэргүүн, Шадар сайд Ө.Энхтүвшин мэдээллээ. 

Тэрбээр "Одоогоор гурван нислэг үйлдээд байна.

• Эхний нислэг зургаадугаар сарын 6-нд Австрали руу нислэг хийхэд бидэнд боломж олдсон. Энэ нь Оюу толгойд ажиллаж байгаа Рио Тинтогийн зарим инженер, техникийн ажилтныг болон Австрали улсын иргэдийг эх оронд нь хүргэх саналыг тус улсын ЭСЯ болон Рио Тинтогийн захиргаанаас Монгол Улсад хүсэлт болгож тавьсан. Манай онгоцыг түрээсэлж хийсэн уг нислэгээр монгол иргэдээ татан авлаа. Нийт 262 иргэнээ авчирсан.
• Зургаадугаар сарын 10-нд 175 иргэн Казахстанаас ирсэн. Тэднийг шинжилгээнд хамруулж байгаа. 
• Зургаадугаар сарын 11-н буюу өнөөдөр Япон руу нислэг үйлдсэн. Орой Улаанбаатарт газардана. 

Цаашид төлөвлөсөн нислэгүүд нь

• Зургаадугаар сарын 12-нд Энэтхэг рүү нислэг үйлдэж, шашны сургуульд сурч буй 256 ламхайг татан авна. Замдаа Лаост бууж, 10 монгол иргэнээ авчрах юм. 
• Зургаадугаар сарын 17-нд Сөүл рүү транзит нислэгээр эх орондоо ирэх иргэдээ авна. Уг нислэгийг үйлдэх зөвшөөрлийг авахад Гадаад харилцааны яамнаас Солонгосын талтай нэлээд хэлэлцээр хийж, өнөөдөр өглөө албан ёсны хариуг Солонгосын талаас ирүүлж, зөвшөөрч байгаагаа мэдэгдсэн. Энэ бол бусад орноос Сөүлд ирсэн иргэдээ татан авна. 
• Зургаадугаар сарын 18-нд Сөүл рүү дахин нислэг үйлдэж, БНСУ-д ажиллаж, амьдарч байсан болон түр хугацаагаар зорчсон иргэдээ авчрахаар төлөвлөсөн. 
• Зургаадугаар сарын 19-нд Франкфурт руу нислэг үйлдэж, европт байгаа 260 орчим иргэнээ татан авчирна. 
• Зургаадугаар сарын 20-нд Зүүн Өмнөд Ази руу нислэг хийхээр судалж байна. Ойролцоох улсуудад байгаа иргэдээ цуглуулж чадвал нэг нислэг хийх боломжийг судалж байна. 
• Зургаадугаар сарын 21-нд АНУ-ын Сиэтл хот руу нислэг үйлдэхээр болсон.

Ингэснээр нийт есөн удаагийн нислэгээр 2,300 иргэнээ татан авахаар төлөвлөсөн" гэв.

Видео: