"Төсвийн тодотголыг энэ Засгийн газар хийдэггүй юм гэхэд дараагийнх нь хийх л болно"

 

• Хятадын талтай алдсан хоёр сараа нөхөж ажиллана гэдэг дээр ойлголцсон. Монгол Улстай худалдаа хийхэд хамгийн аюулгүй гэсэн мэдээллийг нөгөө талдаа ойлгуулахыг хичээсэн.  Бид эрүүл мэндээ хамгаалахаас гадна худалдааны түвшнээ бууруулахгүй хадгалж үлдэх нь чухал байна. Боомтоор гарч байсан машины тоо 100 орчим байсан нь өнөөдөр 500 гараад байна. 2017 онд өдөрт 300 орчим машин гардаг байсан бол Хятадын талтай хэлэлцээ хийсний хүчинд 700 болоод явсаар байгаад 1,700-д хүрч байв.
   
• Энэ жилийн эдийн засгийн өсөлт 1 хувь байхаар төсөөлөгдөж, үүнтэй холбоотойгоор бусад бүх тооцоо уялдаад гарч ирж байгаа. Ердийн үед эдийн засагт 5.1 их наяд төгрөг нийлүүлбэл ямар том өөрчлөлт болох вэ гэдгийг эдийн засагчид маань хэлэх байх. Гэтэл 5.1 их наяд төгрөг хийгээд хийгээд өсөлтийг 1 хувь байна гэж таамаглаж байна. 
   
• Иргэдийнхээ аюулгүй байдлыг хангаж эрүүл мэндээ сахин хамгаалах нь чухал ч гэсэн эдийн засгийн тал дээр гадаад худалдан авалтаа нэмэгдүүлэх боломж бидэнд байна.
   
• Манай хил 3 сар хаагдахад бид дотооддоо жишээ нь, 00-ын цаасны хомсдолд ороогүй, зөндөө улс орон хомсдолд орсон. Гэтэл бид ахуйн бараа болоод хүнсний бүтээгдэхүүний хомсдолд өртөөгүй. Энэ нь манай улсын эдийн засаг, гадаад худалдаа эрүүл явж байгаагийн жишээ юм. Манай улс төсвийн сахилга баттай байж, гадаад зах зээлүүдээ нээлттэй байлгаж байсны үр дүн бодитоор гарч байна.
   
• Дэлхийн нийтээр цар тахалд өртөөд байгаа энэ үед манай улсын эдийн засаг хохиролгүй даваад гарна гэж байхгүй. Харин хохирлоо хэрхэн багасгах вэ гэдэг дээр л арга хэмжээ авна.

• Монголын эдийн засаг Коронавирустай байлдахад зориулагдаагүй. Энэ үеийг даваад гарахад өсөлттэй байх эдийн засаг руу эргээд очиход манай бодлого огцом өөрчлөгдөж болохгүй.
   
• Өнөөдрийн байдлаар нийт 80 мянган зээлдэгчийн 3.9 их наяд төгрөгийн зээлд хүрдэл учирлаа гэдэг хүсэлт банканд ирсэн байна. Эхний ээлжид 10 мянган зээлдэгчийн 820 тэрбум төгрөгийн зээлд бүтцийн өөрчлөлт хийчихсэн байна. 
   
• Гаргасан шийдвэрийн хэрэгжилт удаан байна гэж шүүмжилж байна. Гэхдээ банкны ажилтнууд бүх хүнтэй зэрэг уулзаж амжихгүй, бүх зээлийг автоматаар  ижилхэн өөрчилж чадахгүй учраас тухайн зээлдэгч болгонтой харьцаж арга хэмжээ авахад хугацаа шаардагдана.
   
• Монголбанкны гаргасан мөнгөний эх үүсвэрээр ипотекийн зээлд хамрагдсан 72 мянган зээлдэгч байна. Нийт Монгол Улсын хэмжээгээр 99 мянган орон сууцны зээлдэгч байна. Зээл аваад хэрэглэчихсэн хүний хувьд төлөх нь зайлшгүй. Гагцхүү төлж барагдуулахад  цаг хугацааны асуудал шаардагдаж байгаа. Эдийн засаг сэргэхэд тухайн хүн зээлээ төлөх ёстой. Тэгэхгүйгээр тодорхой хэсгийг нь тэглэх асуудал байхгүй, энэ нь Монголбанкны гаргах шийдвэр биш юм.
   
• ЗГ-ын зүгээс манай орлого хүрэхгүй, мөнгө хэрэгтэй, үүнийг Төв банкнаас зээлье гэвэл Монголбанк бондыг нь худалдаж авахад бэлэн. Монголбанканд цаашдаа авах нөөц арга хэрэгслүүд бий. 

Бага орлоготой иргэд хэрэглээний зээлээ хойшлуулах боломжгүй байна

 

• Засгийн газраас авч хэрэгжүүлж байгаа нэгдүгээр хөтөлбөр нэлээн удаан хэрэгжиж эхэлсэн. Дээрээс нь мэдээлэл бүх шатанд тэгш хүрэхгүй болохоор эдийн засгийн хариу үйлдлүүд доголдож эхэлдэг.
   
• Зургаан аймаг болон Улаанбаатар хотын 2 дүүргийн бага, дунд орлоготой өрхүүдээс коронавирусийн үед төр засгаас авч хэрэгжүүлж байгаа арга хэмжээ хэрхэн тус байгаа талаар судалгаа авахад дундаас дээш орлоготой ихэнх айл ипотекийн зээлтэй, бага орлоготой айл өрх буюу 63 хувь нь хэрэглээний зээлтэй гарсан. Өөрөөр хэлбэл, ипотекийн зээл дундаж орлоготой өрхөд чиглэсэн хөтөлбөр гэдэг нь эндээс харагдаж байгаа юм. 
   
• Ипотекийн зээлтэй айл өрхүүд ямар ч бичиг баримт бүрдүүлэхгүйгээр цахимаар зээлээ хойшлуулах хүсэлт өгөөд асуудлаа шийдэж болж байна. Харин бага орлоготой хэрэглээний зээлтэй иргэд интернет байхгүй, төв суурингаасаа алслагдмал амьдардаг, мөн бичиг цаасны мэдлэг бага, орлогоо тодорхой хэмжээнд буурсан гэдгээ баталж чадахгүй байгаа учир хэрэглээний зээлээ хойшлуулах боломжгүй болж байна.
   
• Бага орлоготой айл өрхөд төрөөс авч хэрэгжүүлж байгаа 5.1 их наяд төгрөгийн зээлийг хойшлуулах шийдвэр нь хүрч чадаагүй.
   
• Мөн судалгаанд оролцогчдын 62 хувийнх нь орлого буураагүй, 38 хувийнх нь орлого буурсан үзүүлэлттэй гарсан. 62 хувьд багтаж байгаа иргэдийн 28 хувь нь тэтгэвэр авдаг хөгшид багтаж байсан.
   
• Хувиараа бизнес эрхэлж байгаа, үйлчилгээний салбарт ажиллаж байсан өрхүүдийн 65 хувь нь бизнес нь түр зогссон, ажлаасаа цалинтай болон цалингүй чөлөөлөгдөж, гэрээсээ ажлаа хийж байгаа, ажлаасаа бүр мөсөн чөлөөлөгдсөн байна.

Төсвийн тодотголыг энэ засгийн газар хийдэггүй юм гэхэд дараагийн засгийн газар хийх л болно