Эрүүл мэндийн яамнаас Монгол Улсад бүртгэгдсэн коронавирусийн халдварын эмнэл зүйн шинж тэмдгийн талаар мэдээлэл өгч байна.

ШУУД ҮЗЭХ:

Бусад улс, оронд бүртгэгдсэн тохиолдлуудын эмнэл зүйн шинж тэмдгийн талаар ХӨСҮТ-ийн их эмч Б.Саруул хэлэхдээ:

• Халдвар аваад эхний 1-2 хоногт халуурах шинж тэмдэг мэдрэгдэх бөгөөд энэ үед мөн дотор муухайрах, суулгах зэрэг шинж тэмдэг илэрдэг.
• 3-4 хоногт хоолойн өвдөлт нэмэгдэж, хоолой сөөх, юм залгихад хөндүүрлэх зовуурь мэдрэгдэнэ
• тав дахь өдрөөс толгой эргэх дотор муухайрах, хөдлөхөд хэцүү болох зовуурь илэрнэ гэсэн мэдээлэл байна. Мөн тав дахь хоногоос халуурч эхлэх бөгөөд халууралт аажмаар нэмэгдэнэ.
• Зургаа дахь өдрөөс хуурай ханиалгах, дотор муухайрах, ядарч сульдаж байгаа нь ажиглагдана.
• 7-8 дахь хоногт амьсгалахад цээж хөндүүрлэх, бие сульдах шинж тэмдэг илүү давамгайлж иржээ. Мөн энэ үед хуурай ханиалга нь цэртэй болж эхэлсэн байна.
• Найм дахь хоногоос биеийн байдал улам хүндэрч, цээжээр өвдөж халууралт тогтвортой нэмэгдэх гэсэн эмнэл зүйн шинж тэмдгүүд давамгайлж байна.

"Амт, үнэр мэдрэхгүй байх шинж тэмдэг нийт тохиолдлын 16 хувьд шинээр илэрсэн байна"

ХӨСҮТ-ийн хамгийн сүүлийн үеийн эмнэл зүйн мэдээллийг ХӨСҮТ-ийн тэргүүлэх зэрэгтэй их эмч Б.Бурмаа хүргэлээ.

Тэрбээр хэлэхдээ “Өнөөдрийн байдлаар ХӨСҮТ-д хэвтэн эмчлүүлж байгаа нийт 348 хүн байна. Үүнээс халдвартын клиникт 219 хүн эмчлүүлж байгаа бөгөөд COVID-19 халдвартай холбоотой буюу сэжигтэй, ойрын хавьтал, ажиглалтад байгаа гэсэн 154 хүн бий.

Улсын хэмжээнд COVID-19 халдварын батлагдсан 33 тохиолдол бий. Түүнээс одоогоор найм нь эдгэрч эмнэлгээс гараад сувилалд ажиглалтад шилжсэн.

Өвчтөнүүдийн биеийн байдал бүгд одоогоор тогтвортой байгаа бөгөөд хүндрэлийн шинжгүй байна.

Мөн насны ангиллын хувьд ихэнх тохиолдол нь 15-24 насныхан байна.

Халдвараар өвчилсөн хүмүүсийг хүйсийн хувьд авч үзвэл эмэгтэй 52 , эрэгтэй нь 48 хувийн харьцаатай байгаа юм.

Монгол Улсад бүртгэгдсэн тохиолдлуудаас ажиглахад ихэнхдээ дараах эмнэл зүйн шинж тэмдэг илэрч байна. Үүнд:

• Хоолой өвдөх- 64.7 хувь
• Гүйлгэх, Толгой өвдөх, Хамар битүүрэх, Ханиалгах - 41.2 хувь
• Халуурах- 35.3 хувь
• Булчин өвдөх- 29.4 хувь
• Ядрах , Бөөлжих- 23.5 хувь
• Амьсгал давчдах-17.6 хувь
• Үе мөчөөр өвдөх, Дотор муухайрах, Жихүүдэс хүрэх, Нус гоожих -5.9 хувьтай байна.
• Мөн амт, үнэр мэдрэхгүй байх шинж тэмдэг нийт тохиолдлын 16 хувьд шинээр нэмж илэрсэн байна" гэв.