Алтан овоо, Тэрэлжийн авто замд халтиргаа үүсэж, нийтийн тээврийг богино эргэлтээр явуулж байгааг мэдээллээ

Д.Янжиндулам, ikon.mn
10 минутын өмнө
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

НТБГ-аас мэдээлснээр өнөөдөр цас орсны улмаас авто замд халтиргаа, гулгаа үүсэж зарим чиглэлийн нийтийн тээврийн автобусыг богино эргүүлж байна.

Тухайлбал Сонгинохайрхан дүүргийн Алтан овооны замд гулгаа үүссэн учир Ч:62 “Алтан овоо 48-р гудамж-10-р хороолол”, Ч:57Б “Алтан овоо 48-р гудамж-МУИС” чиглэлийн автобусыг зохицуулалтаар Толгойт Шөнийн дэлгүүр зогсоолоос буцааж, богино эргэлтээр иргэдэд үйлчилж байгаа юм байна.

Мөн Баянзүрх дүүргийн Налайх, Тэрэлжийн замд цас орсны улмаас гулгаа үүсэж, цааш явах боломжгүй байгаа тул зохицуулалтаар Х:4 “10 шар байр-Шилжрээ” чиглэлийн автобусыг Мэлхий хадны зогсоолоос буцаах зохицуулалтыг хийж байгааг мэдэгдлээ.

Өнөөдөр 12:00 цагийн байдлаар 1,183 автобус иргэдийг тээвэрлэж байгаа бол шөнийн тээврийн үйлчилгээнд 7 автобус 22:00 цагаас хойш үйлчилнэ.

Халтиргаа гулгаа ихтэй энэ үед жолооч нарыг нэгдүгээр эгнээгээр явахгүй, нийтийн тээврийн автобусанд саад болохгүй байхыг хүсэв.

Цаг уурын байгууллагаас "Улаанбаатар хотод өнөөдөр(2026.11.16) цас орно. Салхи баруун хойноос 3-8 м/с. 14:00 цагт -8 градус хүйтэн байна" гэж мэдээлээд байна.