А.Цогцэцэг: Хоолны хордлогоор эмнэлэгт хандсан 400 хүнээс шинжилгээ авахад 80 нь бэлгийн замын халдвартай гарсан
Монголын Арьс өнгөний эмч нарын нийгэмлэгийн IV их хурал "Чингис хаан" зочид буудалд өнөөдөр болж байна.
Энэ үеэр Арьсны болон Бэлгийн Замаар Дамжих Халдвар (БЗДХ)-ын өнөөгийн нөхцөл байдлын талаар Анагаах ухааны доктор, профессор А.Цогцэцэг дараах мэдээллийг танилцуулсан юм.
Тэрбээр хэлэхдээ "Сүүлийн жилүүдэд чонон хөрвөсийн өвчлөл нэмэгдэх хандлагатай байна.
Арьсны нийт өвчлөлийн 20 орчим хувийг чонон хөрвөс эзэлж байгаа гэсэн үг. Мөн арьсны идээт өвчлөлүүд ч илэрч байна. Тиймээс арьсны эмч нар энэ чиглэлээр дараагийн бодлогоо явуулах нь зүйтэй гэж харж байна" гэв.
Хүснэгт1: Арьсны тэргүүлэх өвчин (Сүүлийн таван жилээр)
| Өвчлөл | 2019 | 2020 | 2021 | 2022 | 2023 |
|---|---|---|---|---|---|
| Арьсны бусад идээт өвчлөлүүд | 74,658 | 68,765 | 54,162 | 61,024 | 76,760 |
| Арьстас | 39,006 | 34,646 | 23,388 | 26,720 | 30,568 |
| Атопик дерматит | 18,094 | 15,074 | 11,069 | 15,824 | 18,946 |
| Бусад дерматит | 15,065 | 14,040 | 10,142 | 14,453 | 18,461 |
| Чонон хөрвөс | 13,185 | 11,248 | 8,265 | 11,380 | 12,782 |
Үргэлжлүүлэн "БЗДХӨ нь дараагийн том асуудал.
Сүүлийн 70 жилийн хугацаанд Монгол Улсад зонхилон тохиолдох бэлгийн замын халдварын өвчлөл мэдэгдэхүйц буурч, 10,000 хүн тутамд 156.5 тохиолдлоос 10.9 тохиолдол болж багассан. Энэ нь олон улсын түвшинд ойртсон эерэг үзүүлэлт боловч дээрх тохиолдлыг бодит үнэн үү, үгүй гэдэгт анхаарлаа хандуулах ёстой.
Сая хоолны хордлогоор Халдварт Өвчин Судлалын Үндэсний Төвд 400 хүн Өмнөговь аймгаас ирж шинжилгээ өгсөн. Эрүүл мэндийн шинжилгээгээр 400 хүнээс 80 нь бэлгийн замын халдварт өвчтэй гарсан.
Иймд ээлжээр байрлаж ажилладаг хүмүүсийнхээ эрүүл мэндэд анхаарлаа хандуулах нь зүйтэй гэсэн дүр зураг харагдсан" гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
