Өмнөд Солонгосын нийслэлд “хайрын шавж”-ийн тархалт эрс нэмэгджээ

Сүүлийн өдрүүдэд Өмнөд Солонгосын нийслэл Сөүл хот болон түүний хөрш Инчон зэрэг хотуудад нэг төрлийн шавжийн тархалт эрс нэмэгдэж, иргэдийн тав тухыг алдагдуулах болсон байна.

Агаарын хэт халалт энэ амьтны тархалтыг нэмэгдүүлсэн гэж мэргэжилтнүүд үзэж байгаа гэнэ.

Тус улсын байгаль орчны яам шавжийн дэгдэлт ноцтой хэмжээнд хүрсэн Сөүл хотын баруун хэсэгт оршдог Гейнсан уул руу олон арван мэргэжилтнийг илгээж байгаагаа Баасан гарагт зарласан байна.

Шинжлэх ухаанд “Plecia longiforceps” гэж нэрлэгддэг энэ амьтан агаарт нисэж байх үедээ үржлийн харилцаанд ордог тул “хайрын шавж” (lovebug) хэмээх албан бус нэртэй болжээ.

Зүүн өмнөд Хятад, Тайвань, Японы Рюкю арал зэрэг халуун бүс нутгийн уугуул энэ шавж бас Төв Америкийн зарим хэсэг, АНУ-ын Техас, Флорида зэрэг өмнө зүгийн мужуудаас илэрдэг.

 

2015 онд Өмнөд Солонгост анх удаа илэрсэн бөгөөд Хятадын өмнөд хэсгээс ирсэн гэж тус улсын байгаль орчны яам үздэг юм байна.

2022 оноос хойш Сөүл хотын ойр орчимд, ялангуяа боомтын бүсүүдэд зургаагаас долдугаар сарын хооронд үзэгддэг болжээ.

Уур амьсгалын өөрчлөлт, дэлхийн дулаарал энэ амьтныг хойд зүгт тархахад нөлөөлсөн гэж мэргэжилтнүүд үзэж байна.

Хэдийгээр өвчин дамжуулдаггүй, хаздаггүй ч байшин барилгын хана туурга, цонх, автомашины шилэнд олноор наалдаж, хүмүүсийн аюулгүй байдал, тав тухыг алдагдуулдаг ажээ.

Одоогоор Өмнөд Солонгосын албаныхан хортон шавж устгалын элдэв химийн бодис ашиглахын оронд усаар шүрших, зориулалтын материалд наалдуулах зэргээр тэмцэхийг иргэдэд зөвлөж байгаа юм байна.

 

Сөүлийн захиргаа уг амьтныг хүний эрүүл мэндэд аюулгүй, авгалдай нь ургамлын тоос хүртэх явцад органик материал болдог тул “экологийн хувьд ашигтай” гэж үзэж байгаа гэнэ.

Гэхдээ хотын захиргаанд иргэдээс ирсэн гомдол 2023 онд 4,418 байснаа 2024 онд 9,296 болон огцом өссөн нь асуудал дагуулж байгаа ажээ.

Баасан гарагт тус улсын байгаль орчны яаманд болсон хурлаар энэ жилийн дэгдэлтийн хариу арга хэмжээг нэмэгдүүлэх, илүү их хөрөнгө мөнгө зарцуулахаар холбогдох байгууллагууд тохиролцсон байна.

Нөгөө талаар болжмор, шаазгай зэрэг шувууд энэ шавжийг идэж сурснаар тоо толгой нь буурч, байгаль өөрөө өсөлтийг нь хязгаарлаж эхлэх магадлалтай гэж мэргэжилтнүүд дүгнэжээ.

Эх сурвалж: CNN