Монголын Боксын Үндэсний шигшээ багийн ахлах дасгалжуулагчаар куба мэргэжилтэн Рубен Пинейро Санчез ажиллана

Монголын Боксын Холбоо шигшээ багийн шинэ ахлах дасгалжуулагчийг зарлалаа. Тодруулбал куба мэргэжилтэн Рубен Пинейро Санчез зургаан сарын хугацаатай энэ албанд томилогдсон байна.

Рубен Пинейро Санчез 2004-2005 онд Олимпын аварга, Монгол Улсын Хөдөлмөрийн баатар, Монгол Улсын Гавьяат тамирчин Э.Бадар-Ууганы дасгалжуулагчаар ажиллаж байсан туршлагатай дасгалжуулагч юм.

Рубен сонирхогчдын боксоор Кубын шигшээ багт 10 гаруй жил зүтгээд дасгалжуулагчийн албанд шилжсэн. Австралийн Перт хотод боксын клубээ нээж, хүүгийнхээ хамт дасгалжуулагчаар нь ажилладаг.

Түүнийг ажиллаж байх хугацаанд боксын Дэлхийн цомын тэмцээн Бразил, Казахстанд болох юм. Мөн Чех улсад олон улсын чансаа олгох тэмцээн болох хуваарьтай.