Н.Батсүмбэрэл: Эх оронч дүр гаргаж эх орны эсрэг зүйл хийдгээ боль. Ганбаа ах аа одоо маскаа тайл

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын чуулганы өнөөдрийн хуралдаанаар Цөмийн энергийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийн зарчмын зөрүүтэй 21 асуудлаар санал хурааж, эцсийн хэлэлцүүлэгт бэлтгүүлэхээр Аюулгүй байдал, гадаад бодлогын байнгын хороонд шилжүүлэв. 

Энэ үеэр Төсвийн байнгын хорооны дарга Ц.Даваасүрэн тус хуулийн төслийн "20¹ .3.Ашигт малтмалын нөөц ашигласны төлбөр (АМНАТ)-ийг цацраг идэвхт ашигт малтмалын борлуулалтын үнэлгээний 5 хувиар ногдуулна" гэсэн заалтын 5 гэснийг 9 хувь болгож өөрчлүүлэхээр зарчмын зөрүүтэй санал оруулж иржээ. 

Үүнтэй холбогдуулан санал хураалт явуулж, УИХ-ын гишүүдийн олонх нь Ц.Даваасүрэн гишүүний гаргасан тус саналыг дэмжсэнгүй. Энэ заалттай холбогдуулан гишүүд дараах байр суурийг илэрхийлэв.

УИХ-ын гишүүн П.Сайнзориг: Би Ц.Даваасүрэн даргын гаргасан саналын эсрэг санал гаргаж байна. Цаашдаа Монгол Улсад уран олборлох асуудлыг том зургаар нь харах ёстой. 

Үүний цаана гадаадын хөрөнгө оруулалтыг дэмжих эсэхийг шийдвэрийг гаргах нөхцөл байдал дээр байна. Ард түмний төлөө гэж хэлчхээд эсрэг санал гаргаад сууж байгаа нь харамсалтай. Казахстаны АМНАТ авч буй арга нь өөр. Борлуулалт гэхээс илүүтэй ашгаас нь авдгийг харьцуулж харж болно.

УИХ-ын гишүүн С.Ганбаатар: Би 20 жил түмний төлөө зүтгэж байна. Хүн ярих дургүй, асуудал ярих дуртай. Есөн хувийг ард түмэндээ өгье гэж ярихад юу нь буруу вэ. 

Цөмийн энергийн комиссын ажлын албанаас 2015 оны зургаадугаар сарын 26-нд АМНАТ-ийг 9 хувь болгоход бэлэн байна гэж байсан. Миний гол ярих гээд байгаа санаа бол асуудлаа ярьж суръя. Гишүүд сонгогчдынхоо төлөө ярих эрхтэй. Ямар хар сүүдэр та нарыг минь дайрчхав. 

УИХ-ын гишүүн Н.Батсүмбэрэл: Олон жил суусан ах маань буруу ярьж байна. Энэ бол ураны тухай хууль биш. УИХ-д олон жил суучхаад өөрсдийгөө бүгдийг мэддэг юм шиг царай гаргадгаа боль. 

Эх оронч дүр гаргаж эх орны эсрэг зүйл хийдгээ боль. Ганбаа ах аа одоо маскаа тайл. Худлаа жүжиг гаргаж, эх орончдын царай гаргадаг хүмүүсийг бодитой харах ёстой. Энэ саналыг гаргасан нөхөр өөрийнхөө удирддаг байнгын хороонд гишүүдийнхээ ирцийг харж байгаад гаргаад ирсэн юм шиг байна.  

шууд үзэх: