Монгол, Беларусийн сайд нар Сэлэнгэ аймагт 1,200 үнээ бүхий сүүний эрчимжсэн цогцолборын шавыг тавив

Беларусь улсын ерөнхийлөгч А.Г.Лукашенко манай улсад хийж буй төрийн айлчлалын хүрээнд тус улсын ХААХ-ний сайд Бартош Сергей Иванович, Аж Үйлдвэрийн сайд Рогожник Александр Николаевич болон албаны төлөөлөгчид Монгол Улсын ХХААХҮ-ийн сайд Х.Болорчулуунтай уулзалт хийж хөдөө аж ахуй, аж үйлдвэрийн салбарт хамтран ажиллах таван санамж бичгийг байгуулжээ.

Энэ дагуу Сэлэнгэ аймгийн нутагт 1,200 үнээ бүхий ‘’Сүүний чиглэлийн эрчимжсэн цогцолбор’’ хоёр аж ахуй байгуулах бүтээн байгуулалтын шавыг өчигдөр/2024.06.03/ тавьсан байна.

Ингэснээр орон нутгийн онцлогт тохирсон үүлдэр бий болгох судалгааны ажлаар Беларусь улстай хөдөө аж ахуйн салбарын бүтээн байгуулалтын хамтын ажиллагааг албан ёсоор эхлүүлжээ.

ХХААХҮЯ-наас мэдээлснээр тус хоёр аж ахуй нь сүүний чиглэлийн үхэр үржүүлж буй аж ахуйн нэгж, иргэдийн үхрийн чанар, нэгжээс авах ашиг шим, үхрийн үүлдэрлэг байдлыг сайжруулах, эрчимжсэн аж ахуйг хөгжүүлэх, сүүний импортыг бууруулж, экспортыг дэмжих зорилготой аж.

Мөн трактор угсрах “Минскийн тракторын үйлдвэр” нээлттэй хувьцаат компанийг Монгол Улсад байгуулах, малын тэжээл бэлтгэхэд шаардлагатай техник, тоног төхөөрөмж нийлүүлэх, мал, амьтны эрүүл мэндийг хамгаалах, хөдөө аж ахуй салбарт боловсон хүчин бэлтгэх хөтөлбөр, шинэ үр тариа, сорт ханган нийлүүлэх зэрэг чиглэлээр хамтын ажиллагааг эрчимжүүлэх талаар санал солилцжээ.