Уншиж байна ...
Зураг
Зураг

Монголын банкууд Оросын компаниудын төлбөр тооцоонд хориг тавьж эхэлснийг шүүмжилжээ

Т.Давааням, ikon.mn
2024 оны 5 сарын 23
iKon.MN
Зураг зураг
Монгол Улсын Ерөнхийлөгчийн Тамгын Газар

Турк, Арабын Нэгдсэн Эмират, Хятад зэрэг “найрсаг харилцаатай” улсуудын банкууд АНУ-ын эдийн засгийн хоёрдогч хоригт орохоос болгоомжлох үүднээс Оросын компаниудын төлбөр тооцоонд хориг тавьж эхэлсэн юм.

Тэгвэл тэдний араас Монгол улс нэмэгдэж байгааг ОХУ-ын албаны хүн шүүмжлэн ярьсан тухай ТАСС агентлаг Лхагва гарагт мэдээлжээ.

Тухайлбал Улаанбаатарт болсон “Монгол улс, Евразийн Эдийн Засгийн Холбооны орнуудын худалдаа, эдийн засаг, хөрөнгө оруулалтын хамтын ажиллагааны хэтийн төлөв” бага хурлын үеэр ОХУ-ын ерөнхийлөгчийн дэргэдэх РАНХиГС гадаад худалдааны судалгааны олон улсын лабораторийн тэргүүн Александр Кнобель энэ талаар ярьсан байна.

“Хоёрдогч хориг арга хэмжээний эрсдэлээс үүдэн Монгол, Оросын банк хоорондын төлбөр тооцоонд хүндрэл үүсэх болсон. Энэ асуудлыг хоёр талын түвшинд шийдэх ёстой. Худалдааны эргэлтийн өсөлтөд юуны түрүүнд ложистик, санхүүгийн хязгаарлалт бэрхшээл учруулж байна. Зүүн чиглэлийн төмөр замын ачаалал их, дамжин өнгөрөх тээврийн үнэ тариф өндөр байна” гэж Кнобель ярьсныг ТАСС дамжуулжээ.

Тэрбээр Россотрудничество байгууллагын Монгол дахь төлөөлөгчийн газраас зохион байгуулсан уг бага хуралд модератороор оролцсон юм байна.

Украины дайнтай холбоотой АНУ-ын эдийн засгийн хориг арга хэмжээний улмаас ОХУ нь олон улсын банк, санхүүгийн сүлжээнээс тусгаарлагдах болсон.

Энэ оны эхнээс Турк улсын банкууд Оростой холбоотой төлбөр тооцоонуудыг хориглож эхэлсэн юм. Уг асуудлыг шийдвэрлэх яриа хэлэлцээ үр дүнд хүрэхгүй байгааг Анкара дахь ОХУ-ын элчин сайд Алексей Ерхов өнгөрсөн сард хэвлэлд ярьж байв.

Өрнөдийн хоригийг даван туулах Оросын бас нэг чухал гарц болж байсан Арабын Нэгдсэн Эмират Улсын банкууд ижил арга хэмжээг авч эхэлжээ.

Тухайлбал “First Abu Dhabi Bank”, “Dubai Islamic Bank” банкууд Оросын гадаад худалдааны хэд хэдэн дансыг хаасан байна.

Гуравдугаар сард Хятадын банкууд Оросын төлбөр тооцооны 80 хувийг зогсоосон тухай ажиглагчид мэдээлж байлаа.

Саяхан Бээжинд БНХАУ-ын дарга Ши Жиньпинтэй уулзсан ОХУ-ын ерөнхийлөгч Владимир Путин уг асуудлыг шийдвэрлэж чадаагүй байна.

“Хэн ч алдагдал хүлээхийг хүсдэггүй болохоор банк санхүүгийн томоохон байгууллагуудын авч буй арга хэмжээг ойлгож болно. Үүнд шийдэл бий. Мэдээж үүнийг хэрэгжүүлэхэд төрийн дэмжлэг хэрэгтэй. Асуудал шийдэгдэнэ гэж найдаж байна” гэж Путин айлчлалынхаа төгсгөлд мэдэгдсэн юм.

 

Эх сурвалж: The Moscow Times