Өрсөлдөгчөө хазсан холимог тулаанчийг холбооноос хасав

CNN

Холимог тулааны UFC холбооны тамирчин Игорь Северино өчигдөр Лас Вегаст болсон тулааны үеэр өрсөлдөгч Андре Лимаг хазсан тул шүүгч тоглолтыг зогсоож, А.Лимаг ялсан гэж үзлээ.

Өрсөлдөгчөө "амталсан" И.Северинотой байгуулсан гэрээгээ цуцалж байгаагаа UFC холбооны тэргүүн Дана Уайт зарласан юм. "Ирээдүйтэй тамирчид ёс зүйтэй байх ёстой" гэж Д.Уайт онцолжээ.

Харин хохирогч А.Лима хазуулсныхаа төлбөрт 50,000 ам.доллар "халаасалсан" юм. Холбооны зүгээс шилдэг тулаан үзүүлсэн тамирчинд ийм урамшуулал олгодог билээ.   

 

Instagram

Бразил тулаанч А.Лима төсөөлөөгүй ялалтдаа зориулан И.Севериногийн шүдний ором бүхий шивээс хийлгэжээ. Сахиус хочит бразил эр холимог тулааны замналдаа найм дахь ялалтаа байгуулсан.

Лас Вегас хотод болсон тулааны үеэр дөрвөн тамирчин шилдэг тулааны урамшуулал болох 50,000 ам.доллар авсан юм. Харин А.Лима UFC холбооны түүхэнд өрсөлдөгч нь хасагдсаны улмаас урамшуулал авч буй анхны тулаанч болж түүхэнд үлджээ. Ингээд зогсохгүй холбооны тэргүүн Дана Уайт хувийн зүгээс 25,000 ам.доллароор шагнасан аж.

Эх сурвалж: CNN