Г.Энхтайван: 10 ширхэг цахилгаан автобус, 41 цэнэглэх төхөөрөмж илүү нийлүүлэх саналыг ирүүлсэн гүйцэтгэгч компанийг шалгаруулсан
Солонгосын "Daewoo Bus" компанид үйлдвэрлэсэн шинэ ногоон автобустай холбоотой цаг үеийн асуудлаар албаныхан хэвлэлийн бага хурал хийж, мэдээлэл өгөв.
Энэ үеэр Нийслэлийн Худалдан авах ажиллагааны газрын дарга Г.Энхтайван "Их багтаамжийн автобус, дунд багтаамжийн автобус, их багтаамжийн цахилгаан автобус худалдан авах ажлыг Улсын төсвийн хөрөнгө 318 тэрбум төгрөгийн хүрээнд зохион байгуулсан.
Ингэхдээ долоон оролцогч талаас санал авсан. Эдгээр долоон чадамж бүхий этгээдээс хамгийн бага үнийн санал ирүүлсэн гүйцэтгэгчийг шалгаруулсан.
Шалгарсан этгээд нь цахилгаан автобус цэнэглэх 41 төхөөрөмжийг нэмэлтээр үнэ төлбөргүй өгөх, мөн цахилгаан автобус захиалагчийн хүссэн тооноос илүү хэмжээтэйгээр нийлүүлэх саналыг ирүүлсэн үндэслэлээр гүйцэтгэгчийг шалгаруулсан байдаг.
Тодруулбал гүйцэтгэгчээр "Тэнүүн Огоо" компани шалгарсан. Энэ компани
- Их багтаамжийн автобусны нэг бүрийг нь 336 сая төгрөгөөр нийлүүлэх
- Дунд багтаамжийн автобусыг 218 сая төгрөгөөр нийлүүлэх
- Их багтаамжийн цахилгаан автобусыг 625 сая төгрөгөөр нийлүүлэх саналыг ирүүлсэн.
Мөн нэмэлтээр 10 ширхэг цахилгаан автобус, цэнэглэх 41 төхөөрөмж илүү нийлүүлэх саналыг ирүүлсэн учраас шалгарсан.
Богино хугацаанд үр ашигтай байдлыг харгалзан үзсэн учраас Ажлын хэсгээс тухайн компанийг шалгаруулсан гэсэн үг" хэмээв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
