"Эрдэнэс Монгол" ХХК-ийн ТУЗ-ийн гишүүдийн 51%-ийг төр, 49%-ийг судлаач, бизнесийн салбарын төлөөлөл бүрдүүлнэ
Засгийн газрын өнөөдрийн хуралдаанаар "Эрдэнэс Монгол" ХХК-ийн дүрмийн өөрчлөлттэй холбоотой асуудлыг хэлэлцжээ.
Энэ талаар Засгийн Газрын Хэрэг Эрхлэх Газар(ЗГХЭГ)-ын дарга Д.Амарбаясгалан танилцуулав.
Тэрбээр "Эрдэнэс Монгол" ХХК-ийн дүрэм өөрчлөлтийн гол утга учир нь олон улсын жишигт нийцүүлэх юм. Уул уурхайн компаниудын шийдвэрийг улс төрийн буюу Засгийн газрын түвшинд гаргадаг байсан. Үүнийг бизнесийн, мэргэжлийн түвшинд гаргахаар явж байгаа. Томоохон хэмжээний хөрөнгө оруулалтын гэрээ хэлэлцээрийг "Эрдэнэс Монгол" нэгдэл хийхээрээ онцлог болж байна.
Мөн "Эрдэнэс Монгол" компанийг улс төрөөс байнгын хамааралтай байхыг хязгаарлахаар ТУЗ-ийг бүрдүүлэх зарчмыг өөрчилсөн. Өмнө нь ТУЗ-ийн 66 хувийг төрөөс төлөөлж оролцдог байсан. Харин өнөөдрийн өөрчлөлтөөр 51 хувь нь төрийн төлөөлөл, 49 хувь нь мэргэжлийн мэргэшсэн судлаачид, бизнесийн салбарын төлөөллүүд хараат бус байдлаар ТУЗ-ийн гишүүний эрхийг хэрэгжүүлэх боллоо.
"Эрдэнэс Монгол" ХХК-ийн дүрэм батлагдсанаар Монгол Улсад хэрэгжиж буй компанийн тухай хуулиараа ТУЗ-тэй байх шаардлагагүй, харин хувьцаат компани ТУЗ-тэй байдаг. Өнөөдөр "Эрдэнэс Монгол" компанийн харьяанд байгаа 35 компани ТУЗ-ийн гишүүдтэйгээр үйл ажиллагаа явуулж байгаа.
Тэгвэл өнөөдрийн хурлаар ХХК-ийн ТУЗ-ийг байхгүй болгох, ХК-ийн ТУЗ-ийг нээлттэй ил тод, мэргэжлийн ур чадвартай хүмүүсийг сонгон шалгаруулах шийдэл рүү орж байна.
"Эрдэнэс Монгол" ХХК Монгол Улсын эдийн засгийг тэлэх боломжтой төсөл хөтөлбөрүүдийг хэрэгжүүлснээр баялгийн сангийн суурийг бүрдүүлэх боломжтой болж байна. Тиймээс Баялгийн сангийн тухай хуулийг Засгийн газрын түвшинд бичиж байгаа. Хоёр долоо хоногийн дотор УИХ-д өргөн барихаар зорин ажиллаж байна" хэмээн ярилаа.
