Улсын ерөнхий прокуророор хэнийг ч томилж болдог болох өөрчлөлтийг хуульд оруулах гэж байна
Засгийн газраас Эрүүгийн хуульд нэмэлт, өөрчлөлт оруулах тухай болон Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслүүдийг УИХ-д өргөн мэдүүлээд буй.
Эрүүгийн хуулийн өөрчлөлтөд доромжлох хэмээх зүйл анги оруулсан нь нийгмийн зүгээс багагүй шүүмжлэл дагуулаад байгаа.
Тэгвэл Эрүүгийн хэрэг хянан шийдвэрлэх тухай хуулийн өөрчлөлтийг дагалдуулан Прокурорын тухай хуульд өөрчлөлт оруулах ноцтой заалт хавсаргажээ.
Тодруулбал, Улсын ерөнхий прокурор, түүний орлогчид тавигдах шаардлагыг байхгүй болгосон байна. Одоогийн хүчин төгөлдөр үйлчилж буй хуулийн 45.4-т "Хуульчийн мэргэжлээр 10-аас доошгүй жил ажилласан, гучин таван насанд хүрсэн прокурорыг Улсын ерөнхий прокурор, түүний орлогчоор томилно" хэмээн заасан байдаг.
Харин одоо хэлэлцэх гэж буй хуулийн төсөлд "Прокурорын тухай хуулийн 45 дугаар зүйлийн 45.4 дэх хэсгийн “прокурорыг” гэснийг “Монгол Улсын иргэнийг” гэж өөрчилсүгэй" гэдэг заалт оруулсан байна.
Хэрэв энэ өөрчлөлтийг УИХ баталбал прокурорын байгууллагын удирдлагад тавигдах шаардлага байхгүй болж, Улсын ерөнхий прокурорыг улстөрчид өөрсдийн үзэмжээр томилдог болох эрсдэлтэй юм.
Энэхүү хуулийн өөрчлөлтийг УИХ маргааш буюу тавдугаар сарын 31-нээс эхлэн хэлэлцэх гэж байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
23 СЭТГЭГДЭЛТЭЙ
|
