Намын гишүүнээс гарсан тохиолдолд тухайн хүнд улс төрийн дэмжлэг үзүүлэхгүй гэсэн заалт үйлчилдэг гэв

Гэрэл зургийг mpa.mn

МАН-ын Хяналтын ерөнхий хороо өчигдөр ээлжит хурлаа хийж, намын хяналтын хорооны дутуу гишүүдээ томилох, энэ онд хийх ажлын төлөвлөгөө болон зарим гишүүнд хариуцлага тооцох зэрэг асуудлыг хэлэлцжээ.

Тус хурлаас гарсан шийдвэрийг өнөөдөр МАН-ын Хяналтын ерөнхий хорооны дарга Д.Батбаяр танилцууллаа. Тэрбээр 2016 оны сонгуулийн дараагаас эхлэн “60 тэрбум” гэх асуудалд манай намын нэрийг холбох болсон тул эцэслэн хариу өгөхөөр тухай үеийн удирдлагуудад хариуцлага тооцох тухай шийдвэрийг 2018 оны наймдугаар сард гаргаж байсан гэв. Гэвч намын дүрэмд нь заасан ёсоор хариуцлага тооцоход учир дутагдалтай байсан тул сахилга хариуцлага тооцох механизмыг өнгөрсөн оны сүүлээр оруулсан хэмээсэн юм. Ийнхүү сахилга, хариуцлагын асуудал тодорхой байдлаар зохицуулагдсан тул зарим хүнд хариуцлага тооцжээ.

Энэ тухай МАН-ын Хяналтын ерөнхий хорооны дарга Д.Батбаяр “Монгол Ардын намын дүрмийн 4.2.1, 4.2.5, 4.2.6, 4.2.8, 4.2.9 дэх заалтуудыг тус тус зөрчсөн гэж үзэн МАН-ын гишүүн Ц.Сандуйг МАН-ын гишүүнээс гарсанд тооцсон. Хоёрдугаарт, МАН-ын дүрмийн 4.2.1, 4.2.5, 4.2.8, 4.2.9, 4.2.10, 4.2.12 дэх заалтыг тус тус зөрчсөн гэж С.Мөнхчулууныг МАН-ын гишүүнээс гарсанд тооцсон шийдвэрийг гаргалаа” гэв. 

Ц.Сандуйг гарсан тооцсон нь заалтууд нь намын эв нэгдлийг хангах, намын нэр хүндийг гутаасан аливаа үйлдлийг гаргахгүй байх, намын нэрийн өмнөөс сонгогдсон албан тушаалтан нь аливаа ашиг сонирхлын нөлөөнд автахгүй байх, намын ёс зүйн хэм хэмжээг сахина зэрэг заалтыг зөрчин, ёс зүйн алдаа гаргасан тул намын гишүүнээс гарсанд тооцсон байна. 

Харин С.Мөнхчулууныг дээрхтэй ижил үндэслэл болон намын эрх ашиг, албан ёсны шийдвэрт хүндэтгэлтэй хандах, Удирдах зөвлөл болон бүх шатны намын байгууллагын шийдвэрийг зөрчихгүй байх гэсэн заалтуудыг зөрчсөн гэж үзжээ. 

Гишүүнээс гарсан тохиолдолд тухайн хүнд улс төрийн дэмжлэг үзүүлэхгүй гэсэн заалттай юм байна.