Өчигдөр буюу аравдугаар сарын 13-ны өдөр Чингэлтэй дүүргийн 24 дүгээр хороо, Майхан толгойн арын аманд шар өвсний түймэр гарч, 7 га талбай өртжээ.

Түймэр гарсан шалтгааныг тогтооход ногоон бүсэд оршин суудаг иргэн ил задгай арц, хүж уугиулснаас үүдэлтэй байж болзошгүй бөгөөд албаныхан нөхцөл байдалд дүн шинжилгээ хийж, хуулийн хүрээнд арга хэмжээ авахаар ажиллаж байгаа аж.

Иргэн санамсар болгоомжгүйгээс гал алдсан бол Зөрчлийн тухай хуульд заасны дагуу, харин учирсан хохирлыг хэмжээ их бол Эрүүгийн хариуцлага хүлээдэг байна. 

Зөрчлийн тухай хуулиас:

5.14 дүгээр зүйл.Галын аюулгүй байдлын тухай хууль зөрчих

1.Иргэн, хуулийн этгээд галын аюулгүй байдлыг хангах үүргээ биелүүлээгүй, эсхүл галын аюулгүй байдлын дүрэм, журам, галын аюулгүй байдлыг хангах талаар тавигдах нийтлэг шаардлагыг зөрчсөн бол учруулсан хохирол, нөхөн төлбөрийг гаргуулж хүнийг нэг зуун нэгжтэй тэнцэх хэмжээний 100,000 төгрөгөөр, хуулийн этгээдийг нэг мянган нэгжтэй тэнцэх хэмжээний 1,000,000 төгрөгөөр торгоно.