АНУ-ын ерөнхийлөгч Трамп вений судасны өвчтэй болсныг оношилжээ

Сүүлийн өдрүүдэд АНУ-ын ерөнхийлөгч Дональд Трампын хавдсан хөл, хөхөрсөн гарны гэрэл зураг интернэт орчинд дуулиан дэгдээгээд байгаа.

Эндээс үүдэн 79 настай ерөнхийлөгчийн эрүүл мэндтэй холбоотой элдэв таамаг хүмүүсийн дунд яригдах болжээ.

Тэгвэл Цагаан ордон өчигдөр Трампын эрүүл мэндтэй холбоотой мэдээллийг сэтгүүлчдэд өгсөн байна.

Цагаан ордны хэвлэлийн төлөөлөгч Каролин Левитт энэ үеэр Трампын эмчийн захидлыг уншиж сонсгосон юм.

Уг захидалд ерөнхийлөгчийн хавдсан хөлийг ердийн вений судасны өвчлөлтэй холбоотой шинж тэмдэг, гарын хөхрөлтийг хүмүүстэй олон удаа гар барьсантай холбоотой хэвийн үзэгдэл гэж тайлбарласан байна.

Аль аль шинж тэмдэг нь ерөнхийлөгчийн эрүүл мэндэд хор хөнөөлгүйг мэдэгджээ.

Трампын эмч Шон Барбабелла хэт авианы шинжилгээгээр ерөнхийлөгчид вений судасны архаг дутагдал илэрснийг “70-аас дээш насны хүмүүст элбэг тохиолддог эмгэг” гэж тодорхойлсон байна.

Энэ нь АНУ-ын ерөнхийлөгч агсан Ричард Никсонд тохиолдож байсан вений тромбоз, эсвэл артерийн судасны өвчин биш болохыг эмч баталжээ.

Трампын баруун гарын ар тал хөхөрснийг Барбарелла эмч “хүмүүстэй байнга гар барих, зүрх судасны өвчнөөс урьдчилсан сэргийлэх стандарт дэглэмийн нэг хэсэг болох аспириний хэрэглээ зэргээс үүдэлтэй зөөлөн эдийн бага зэргийн цочрол” гэж тайлбарласан байна.

Эцэст нь эмч “Ерөнхийлөгч Трампын биеийн байдал маш сайн хэвээр байгаа” гэж дүгнэжээ.

Цагаан ордны хэвлэлийн төлөөлөгч дээрх хоёр шинж тэмдэг Трампыг ажил үүргээ гүйцэтгэхэд саад болохгүй байгааг мэдэгдсэн байна.

Мэргэжилтнүүдийн хэлж байгаагаар вений судасны архаг дутагдал нь хөлийн доод хэсгийн судаснуудаас цусыг зүрх рүү шахахад хүндрэл учруулдаг гэнэ.

Үүнийг эмчлэхдээ бариу оймс өмсөх, хөлийг өргөх зэрэг аргууд хэрэглэдэг юм байна.

“Түүнд зүрхний өвчин байхгүй байсан ч энэ шинж тэмдгийг арилгах хэрэгтэй. Хэрвээ эмчлэхгүй удвал хаван, шархлаа үүсэж, илүү ноцтой нөхцөлд хүрэх боломжтой” гэж Хартфорд дахь Коннектикутын Их сургуулийн судасны мэс заслын салбарын эрхлэгч Кваме Аманквах тайлбарлажээ.

Трамп дөрөвдүгээр сарын 11-ний өдөр Вашингтоны ойролцоох Уолтер Ридийн нэрэмжит Үндэсний Цэргийн Эмнэлэгт ээлжит эрүүл мэндийн үзлэг шинжилгээнд орж байсан юм.

Эндээс түүнийг ямар нэг эрүүл мэндийн том асуудалгүй, зүрх судасны ажиллагаа хэвийн гэсэн дүгнэлт гарч байлаа.

Эх сурвалж: Reuters