"Сэлбэ дэд төв сүндэрлэх талбайд газраа чөлөөлсөн 1,670 иргэнд нөхөн олговор өгөхөөр болсон"

Нийслэлийн Чингэлтэй дүүргийн 14, 18 дугаар хороо, Сүхбаатар дүүргийн 14 дүгээр хорооны нутаг дэвсгэрт 158 га талбайд сүндэрлэх Сэлбэ дэд төвийн барилгажилтын талбайд газар чөлөөлөлт, талбайн цэвэрлэгээ хийгдэж, 2025 оны хоёрдугаар сарын байдлаар уг төслийн газар чөлөөлөх явц 80 гаруй хувьд хүрчээ.

Тодруулбал нийт 2,200 иргэн, хуулийн этгээдийн газрыг чөлөөлөхөөс 1,670 иргэнтэй нөхөн олговрын гэрээ байгуулжээ.

Энэ тухай Нийслэлийн Газар зохион байгуулалтын албаны Газар чөлөөлөх хэлтсийн ахлах мэргэжилтэн Ю.Одгэрэл "Сэлбэ дэд төвийн гэр хорооллыг орон сууцжуулах төслийн газар чөлөөлөлт 80 гаруй хувьтай үргэлжилж байна. Өнөөдрийн байдлаар 1,683 айлтай нөхөн олговрын гэрээ байгуулснаас 1663 айлын нөхөн олговрыг олгоод байгаа юм.

Мөн 1,067 нэгж талбарыг цэвэрлэж, ариутгасан бөгөөд газар чөлөөлөлтийн хүрээнд 2,800 гаруй янданг буулгаснаар агаарын бохирдол буурахад нөлөөлж байна” гэв. Нөхөн олговрын хэмжээ дунджаар 150-300 сая төгрөг болж байгаа юм байна.

Одоогийн байдлаар хөрсний ус зайлуулах зураг төслийг хийж байгаа бөгөөд цахилгаан дамжуулах агаарын шугам буулгах, трасс шилжүүлэх, буулгах ажлын бэлтгэлийг хийж байгаа аж.

Сэлбэ дэд төвд нийт 10,063 айлын 113 блок барилга барих бөгөөд есөн давхар 87 айлын 93 блок, 12 давхар 117 айлын 12 блок, 12 давхар 71 айлын найман блок тус тус ашиглалтад оруулахаар төлөвлөжээ.

Гурван блок нь сургууль, таван блок нь цэцэрлэг, 100 ортой эмнэлэг, авто зогсоолын талбай 47,530 ам.метр байх бол 152,650 ам.метр талбайд худалдаа, үзвэр үйлчилгээ, оффисын зориулалттай барилга, спорт цогцолбор, ногоон байгууламж, авто зам, дугуйн зам, явган хүний замтай байх юм байна.

Энэ онд газар чөлөөлөлт, нөхөн олговорт 359 тэрбум төгрөгийг зарцуулахаар нийслэлийн төсөвт тусгажээ.