Маргааш баруун болон төвийн аймгуудын нутгаар цасан шуурга шуурна

Гэрэл зургийг MPA агентлагийн онцгой зөвшөөрөлтэйгөөр ашиглав

Маргааш буюу нэгдүгээр сарын 23-нд баруун аймгуудын нутгийн баруун болон хойд, төвийн аймгуудын нутгийн баруун хойд хэсгээр цас орж, цасан шуурга шуурахыг Цаг уур, орчны шинжилгээний газраас мэдээллээ. 

Иймд зам, даваа, гүвээнд халтиргаа гулгаа үүсэж, үзэгдэх орчин хязгаарлагдахыг анхааруулав. 

Нэгдүгээр сарын 24-нд баруун болон төвийн аймгуудын нутгаар, 25-нд говь болон зүүн аймгуудын нутгаар цас орж, цасан шуурга шуурч, ихэнх нутгаар хүйтний эрч 10-15 градусаар чангарах юм байна. 

ЗӨВЛӨМЖ:

• Хүмүүс төдийгүй тэжээвэр амьтад, ургамалд ч хамгаалалт хэрэгтэй.
• Эрчим хүчний хэрэгцээ хүйтэн цаг агаартай үед нэмэгдэж байгаа тул аль болох эрчим хүч хэмнэхийг хичээ.
• Эрс хүйтрэл нь гал түймэр гарах болон, нүүрстөрөгчийн дутуу ислийн эрсдэлийг нэмэгдүүлдэг. Тиймээс та аюулгүй халаалтын эх үүсвэр ашиглаж байгаа эсэхээ шалгаарай.
• Мөн илчлэг сайтай хоол хүнс хэрэглэх, өндөр настай хүмүүс халтирч унахаас болгоомжлоорой.