Х.Нямбаатар: Дулааны V цахилгаан станцад хөрөнгө оруулах сонирхлоо илэрхийлсэн ААН-тэй урьдчилсан яриа хэлэлцээ хийж байгаа
Улаанбаатар хотын эрчим хүчний хэрэгцээг хангахад чиглэсэн төсөл хөтөлбөрүүдэд гадаадын хөрөнгө оруулалт татах, хамтран ажиллах боломжийн талаар ярилцаад ирсэн тухайгаа нийслэлийн Засаг дарга Х.Нямбаатар өнөөдөр танилцуулав.
Тэрбээр ойрын үед хэд хэдэн улсад ажиллаж, төслүүдийг танилцуулахад хөрөнгө оруулагчид нааштай хандаж байсныг онцлов.
Нийслэлийн Засаг дарга Х.Нямбаатар "Нийслэл Улаанбаатар хотод эрчим хүчний зургаан төсөл хэрэгжүүлэхээр төлөвлөсөн бөгөөд заримынх нь Техник, Эдийн Засгийн Үндэслэл(ТЭЗҮ) батлагдсан, заримынх нь урьдчилсан ТЭЗҮ боловсруулагдаж байгаа. Төслүүдэд хөрөнгө оруулах сонирхлоо хөрөнгө оруулагчид илэрхийлсэн.
Сүүлийн 25-26 жил яригдсан V цахилгаан станцад хөрөнгө оруулалт хийх сонирхлоо аж ахуйн нэгж, байгууллага илэрхийлээд байгаа. Дараагийн шатны хууль эрхзүйн хэлцлүүд хийгдээгүй байгаа тул аж ахуйн нэгж, улс орныг хэлэх нь зохимжтой биш.
Байршлын хувьд "ТЭЦ II"-ын үнсэн санг түшиглэж, дулааны V цахилгаан станцын батлагдсан ТЭЗҮ дээр төр, хувийн хэвшлийн түншлэлийн хүрээнд гэрээ хэлцэл байгуулах урьдчилсан яриа хэлэлцээ хийгдэж байна.
Мөн Шинэ Зуунмод хотын 220 МВт-ын Дулааны цахилгааны төсөл яригдаж байна. Эмээлтийн эко аж үйлдвэрийн паркийн 24 МВт-ын дулааны цахилгаан станцын төсөлд 2-3 хөрөнгө оруулагч хөрөнгө оруулах сонирхолтой байгаа.
"Эрдэнэс Баянбогд" гэж нийслэлийн хүрэн нүүрсний ордыг түшиглэсэн 300 МВт-ын станцын ТЭЗҮ батлагдаж байгаа. Үүнд хөрөнгө оруулагчид сонирхлоо илэрхийлж байна.
Улаанбаатар хот хоёр хогийн цэгээ түшиглэж 18 МВт-ын цахилгаан гаргадаг хог шатаах үйлдвэр байгуулах чиглэлээр Бээжин хотод хийсэн хөрөнгө оруулалтын уулзалтын үед танилцуулахад олон аж ахуйн нэгж хамтарч ажиллах санал илэрхийлсэн.
Энэ мэтчилэнгээр зөвхөн нүүрс сайжруулах, газ гэхээс илүү эрчим хүчний эдийн хүчний эдийн засгийн өсөлтөө хангасан, орон сууцжуулах бодлогодоо чиглэсэн хөрөнгө оруулалтын хэд хэдэн төсөл хөтөлбөрийг яриад ирлээ" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
