"Хермес болон Геологийн төв лабораторийн нүхэн гарцын бүтээн байгуулалтыг ирэх хавар үргэлжлүүлнэ"

Энэ онд Улаанбаатар хотын гурван байршилд төмөр зам доогуурх гүүрэн гарц барихаар төлөвлөснөөс Таван шарын нүхэн гарцыг ашиглалтад оруулсан бол "Хермес" төв болон Геологийн төв лабораторийн нүхэн гарцын бүтээн байгуулалтын ажил эхлээд байгаа юм.

“Хермес” төвийн төмөр замын нүхэн гарц 3.5 метрийн өндөртэй, 800 метр авто замтай бөгөөд 31,000 машин нэвтрүүлэх бол Геологийн төв лабораторийн нүхэн гарц нь 4.5 метрийн өндөртэй, дөрвөн эгнээ бүхий 1.4 км урт замтай, хоногт 27,500 машин нэвтрүүлэх тооцоолол гарчээ. 

Уг төслийг нийслэл Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгж хариуцан хэрэгжүүлж байгаа.

Энэхүү хоёр нүхэн гарцын бүтээн байгуулалтын ажлын явцын талаар “Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгж”-ийн авто замын инженер М.Золбоогоос тодруулахад "Баянгол дүүргийн нутаг дэвсгэр, Хермес төвийн урд талын нүхэн гарцын хоёр их биеийг бүрэн цутгаж дуусгасан. Ирэх хавар дулааны шугамыг шилжүүлж дууссаны дараа гарцын их биеийг төмөр замын доогуур түлхэх технологиор хийнэ.

Геологийн төв лабораторийн урд талын нүхэн гарц нь хоёр зорчих хэсэгтэй. Нэг талын зорчих хэсгийг дуусгасан. Ирэх хавар дөрөвдүгээр сарын 1-нээс хоёр дахь зорчих хэсгийн ажлыг эхлүүлнэ гэдгийг гүйцэтгэгч компаниас мэдээлсэн.

"Хермес" төвийн урд нүхэн гарц байгуулах төслийн ажлын явц 30%, Геологийн төв лабораторийнх 25%-тай байгаа" гэв.

Харин “Нарантуул” худалдааны төвийн урд уулзварт нүхэн гарц хийх ажил энэ онд эхлээгүй юм.

Эдгээр нүхэн гарцыг БНХАУ-ын "ЭКСИМ" банкны хөнгөлөлттэй зээлээр байгуулж байгаа билээ.