Нууцлаг металл хөшөө Невадагийн цөлд дахин гарч иржээ
Сүүлийн жилүүдэд Умард Америк, Европ даяар үзэгдэх болсон нууцлаг биет АНУ-ын Невада мужийн цөлд дахин гарч иржээ.
Лас-Вегас хотын цагдаа нар өнгөрсөн амралтын өдрүүдэд хотын хойд талын цөлд эрэн хайх, аврах ажиллагаа явуулж байхдаа газарт зоогдсон тэгш өнцөгт хэлбэртэй, гялалзсан металл хөшөөг илрүүлсэн байна.
“Бид маш олон хачирхалтай зүйлтэй тааралдаж байсан… Гэхдээ үүнийг хар даа!” гэж Лас-Вегасын цагдаагийн алба Даваа гарагт сошиал хуудсандаа бичээд биетийн зургийг нийтэлжээ.
Хамгийн анхны ийм биет 2020 онд АНУ-ын Ютагийн цөлд илэрч, дэлхий нийтийг гайхшируулж байсан юм.
Олон хүн үүнийг 1968 оны Стэнли Кубрикийн “2001: A Space Odyssey” уран зөгнөлт кинонд гардаг харь гарагийн биетүүдтэй адилтгаж байв. Ийм биетүүд хүн төрөлхтөнд үсрэнгүй хөгжил авчирч байгааг уг кинонд үзүүлдэг юм.
Дараа нь Нидерланд, Польш, Румын, Канад, Их Британид ижил металл хөшөөнүүд гарч ирж байжээ.
Эх сурвалж: AFP
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
