Франц улсад 180,000 гаруй хүн антисемитизмийн эсрэг жагслаа

Хамас-Израилийн дайны улмаас антисемитист (жүүдийн эсрэг) үзэл гаарч буйг эсэргүүцсэн томоохон арга хэмжээ Ням гарагт Франц улс даяар зохион байгуулагдлаа.

Нийслэл Парис хотод 105,000 хүн жагсаалд оролцсоныг цагдаагийн газар мэдээлсэн бол орон даяар 182,000 хүн жагссаныг Францын дотоод хэргийн яам мэдээлжээ.

Сүүлийн сар хүрэхгүй хугацаанд тус улсад антисемитист үзлийг илэрхийлсэн 1,250 орчим үйлдэл бүртгэгдсэн юм.

“Жүүд иргэд нь айдас түгшүүр дор амьдардаг Франц бол Франц улс биш юм” гэж жагсаалд биечлэн оролцоогүй ерөнхийлөгч Эммануэл Макрон өмнөх өдөр нь нийтлүүлсэн захидалдаа бичжээ.

Өчигдөр Парис, Лион, Ницца, Страсбург зэрэг гол хотуудад нийтдээ 70 гаруй арга хэмжээ зохион байгуулагдсан нь бүгд “Антисемитизмийн эсрэг Бүгд Найрамдах Улсын төлөө” гэсэн уриатай байлаа.

Жагсагчдын аюулгүй байдлыг хангахын тулд зөвхөн Парис хотод 3,000 гаруй цагдаагийн албан хаагч ажиллажээ.

Парисын жагсаалд оролцсон Сенатын спикер Жерар Ларшер “Бүгд Найрамдах Улсын үнэт зүйлсийн эсрэг үзэл санаа антисемитизмтэй тэмцэх явдал бол өнөөдрийн бидний дэг журам юм” гэж хэлсэн байна.

Франц улсад 500,000 орчим жүүд хүн амьдардаг нь Европ тивдээ хамгийн өндөр үзүүлэлт юм.

Парисын жагсаалын тэргүүн эгнээнд Францын парламентын хоёр танхимын спикерүүд, ерөнхий сайд Элизабет Борне, ерөнхийлөгч асан Франсуа Олланд, Никола Саркози нар, шашны зүтгэлтнүүд явсан байна.

 

Аравдугаар сарын 7-ны өдөр Хамас-Израилийн дайн эхэлснээс хойш Парисын жүүд, муслим хүн амын дунд сөргөлдөөн хурцадсан юм.

Аравдугаар сарын 31-ний өдөр Парисын олон арван байшин барилгын хананд “Давидын Од” зурсан хэргийг прокурорууд мөрдөн шалгаж байгаа. Дэлхийн Хоёрдугаар дайны үед Германы нацистууд Парисын жүүд хүн амыг ялгахын тулд орон гэрийнх нь гадаа хананд ийм тэмдэг тавьдаг байсан юм.

Өчигдрийн жагсаалаас хэдхэн өдрийн өмнө Парис хотод “Газад хядлага үйлдэхээ зогсоо” гэсэн уриатай өөр нэг жагсаал болж, хэдэн мянган хүн оролцсон юм.

Эх сурвалж: AFP