Дэлхийн Бөхийн Холбооноос 2027 оны чансааны оноо олгох тэмцээний хуваарийг танилцууллаа

Э.Тэмүүлэн, iKon.mn
0 минутын өмнө
IKON.MN
Зураг зураг

Дэлхийн Бөхийн Холбоо (UWW)-ноос 2027 оны чансааны оноо олгох цуврал тэмцээний хуваарийг албан ёсоор танилцуулжээ. "Лос Анжелес 2028" олимпын оноо олгох чухал гурван тэмцээний нэгийг Улаанбаатар хотод хийхээр болсон байна.

Тодруулбал 

2027 онд зохион байгуулах чансааны оноо олгох цуврал тэмцээнийг 

  • Хорватын Загреб (Хоёрдугаар сарын 1-7-ныг дуустал),
  • АНУ-ын Коралвил (Тавдугаар сарын 31-нээс зургаадугаар сарын 6-ныг дуустал),
  • Монголын Улаанбаатар (Долдугаар сарын 19-нөөс 25-ныг дуустал) зохион байгуулна. 

Хорватын Загреб хотноо 2023 оноос хойш чансааны оноо олгох тэмцээн зохион байгуулж ирсэн бол Улаанбаатар хотод сүүлийн хоёр жил дараалан зохион байгуулсан. Харин АНУ-ын Коралвил хотод анх удаа бөхийн төрлийн шилдгүүд цуглах юм.

Түүнчлэн онооны системд өөрчлөлт оруулсан аж. 2027 оны нэгдүгээр сарын 1-нээс эхэлж мөрдөх шинэ журмаар бөхчүүд барилдаан бүрийнхээ тоогоор чансааны оноо нэмэх боломжтой болсон байна. Тухайлбал олимп, дэлхийн аваргад түрүүлсэн тамирчин 40,000 оноо, тэмцээнд оролцсоныхоо шагналд 250, ялалт бүрийнхээ тоогоор 2,000 оноо чансаандаа авах бол чансааны цуврал тэмцээнд түрүүлсэн тамирчин 20,000, оролцсоныхоо шагналд 150, барилдаанд ялсныхаа тоогоор 1,000 оноо, тивийн болон наадамд түрүүлсэн тамирчин 10,000, оролцсоныхоо шагналд 75, ялалт бүрийнхээ тоогоор 500 оноо авах юм.

"Лос Анжелес 2028" олимпод оролцох чансааны оноог 

  • 2027 оны чансааны оноо олгох цуврал гурван тэмцээн,
  • 2027 оны тивийн аварга шалгаруулах тэмцээн,
  • 2027 оны Дэлхийн Аварга Шалгаруулах Тэмцээн,
  • 2028 оны чансааны оноо олгох цуврал нэг тэмцээн,
  • 2028 оны тивийн аварга шалгаруулах тэмцээнд үзүүлсэн нийлбэрээр эрх олгохоор болжээ.