Уншиж байна ...
Зураг
Зураг
ХУУЧИРСАН МЭДЭЭ: 2023/09/11-НД НИЙТЛЭГДСЭН

"Тарьсан чацарганаа зарж эхлээгүй бол татвар төлөхгүй. Иргэнээс мөнгө авсан гэх НМЭГ-ын ажилтныг шалгаж байгаа"

М.Батчимэг, ikon.mn
2023 оны 9 сарын 11
IKON.MN
Зураг зураг
Олон нийтийн сүлжээнээс авав.

Олон нийтийн сүлжээнд иргэн өөрийн тарьсан чацарганаа зарж борлуулахаар хот руу орж ирэхэд эмээлтийн шалган нэвтрүүлэх дээр холбогдох албаны ажилтан 1 сая төгрөг хувийнхаа дансаар нэхэмжлэн авч хот руу оруулсан гэх мэдээлэл гарсан юм.

Энэ талаар болон тарьсан ургамлаа тээвэрлэж орж ирэхэд татвар, хураамж, шалгалттай холбоотой ямар хууль, эрхзүйн тогтолцоо байдаг талаар холбогдох албаныхнаас тодрууллаа. 

1.ТАТВАР: Өөрөө тариалсан чацарганаа худалдан борлуулаагүй байгаа тохиолдолд татвар авахгүй

Татварын ерөнхий газрын мэдээлснээр иргэн чацаргана тариалаад түүнийгээ худалдан борлуулж эхлээгүй байгаа бол тухайн иргэнээс татвар авах тогтолцоо байхгүй юм байна. 

Харин Хувь хүн болон Аж ажуйн нэгжийн орлогын албан татварын тухай хуулиар жимс, жимсгэнэ бүтээгдэхүүнийг үйлдвэрлэсэн буюу тариалсан иргэн, аж ахуйн нэгжээс зөвхөн тухайн үйлдвэрлэлээс олсон орлогоос нь албан татвар авдаг аж. 

2. ХУРААМЖ: Автомашинаас зөвхөн зам ашигласны төлбөр авна

Шалган нэвтрүүлэх товчоон дээр автомашинаас зөвхөн зам ашигласны хураамжийг автоматаар бүртгэж нэхэмжилдэг мөн жин тонн буюу даац хэтрэлт дээр хяналт тавьдаг талаар Зам тээврийн хөгжлийн төвөөс мэдээлсэн юм. 

3. ШАЛГАЛТ: Нийслэлийн мал эмнэлгийн газар зөвхөн малтай холбоотой зүйлсийг л шалгана 

Эмээлтийн товчоон дээр чацаргана тээвэрлэж явсан иргэнээс 1 сая төгрөг хувь дансаар авсан гэх холбогдох албаны ажилтан нь Нийслэлийн мал эмнэлгийн газар /НМЭГ/-ын ажилтан юм байна. 

Тодруулбал Нийслэл хот руу орж ирэх товчоод дээр мал амьтан тэдгээрийн гаралтай түүхий эд, бүтээгдэхүүн холбогдох шаардлагуудыг хангасан эсэхэд Нийслэлийн мал эмнэлгийн газраас хяналт тавьж ажилладаг аж.

Тус хяналтыг тавьж буй Нийслэлийн мал эмнэлгийн газар нь зөвхөн малтай холбоотой түүхий эд, малын тэжээл зэрэгт хяналт тавина чацарганад хяналт тавихгүй гэдгийг Мал эмнэлгийн ерөнхий газрын холбогдох мэргэжилтэн хэллээ. 

Тэгвэл тус НМЭГ-ын ажилтныг Сонгинохайрхан дүүргийн цагдаагийн I хэлтэс дээр шалгаж байгаа гэдгийг цагдаагийн байгууллагаас мэдээллээ.