Цахилгаан түгээлтийн алдагдал, өртөг зардлыг бууруулах “Ухаалаг тоолуурын систем"-ийн төсөл дэмжигджээ
Улаанбаатар цахилгаан түгээх сүлжээ ТӨХК-ийн удирдлагууд үйл ажиллагаандаа нэвтрүүлэхийг зорьж буй “Ухаалаг тоолуурын систем”-ийн төслөө Эрчим хүчний зохицуулах хорооны Зохицуулагч нарт өчигдөр танилцуулжээ.
“Ухаалаг тоолуурын систем”-ээр дамжуулан цахилгаан эрчим хүчний борлуулалтад ашиглаж буй хүний хүчинд тулгуурласан, механик ажиллагаа их, өртөг өндөртэй тоолуурын системийг халж, хангамж, хэрэглээний тэнцвэржүүлсэн менежмент бүхий илүү технологижсон шинэчлэлийг хийх зорилготой аж.
Ингэснээр ажлын бүтээмжийг нэмэгдүүлэх, цахилгаан түгээлтийн алдагдал, өртөг зардлыг тус тус бууруулах боломжууд бий болно.
Танилцуулгын төгсгөлд УБЦТС ТӨХК-ийн одоогийн үйл ажиллагаанд тулгамдаж буй асуудлуудыг нэмэлтээр танилцуулж, хэрэгжүүлэхээр зорьж буй “Ухаалаг тоолуурын систем”-ийн төсөл нь эдгээрийг шийдвэрлэх гарц болно гэсэнтэй Эрчим хүчний зохицуулах хорооны дарга Э.Түвшинчулуун болон бусад Зохицуулагчид санал нэгдэж, төслийг хэрэгжүүлэхэд тус хорооноос шаардлагатай эдийн засгийн дэмжлэгийг үзүүлж ажиллахаа илэрхийлсэн байна.
Эх сурвалж: Улаанбаатар цахилгаан түгээх сүлжээ ТӨХК
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
