Польш нь дэлхийн 21 дэх том эдийн засагтай улс

Манай улсад хийж буй Польш улсын ерөнхийлөгч Анджей Дудагийн айлчлалтай холбогдуулан тус улсын эдийн засгийн хүчин чадлын талаар зарим онцлох тоо баримтыг танилцуулж байна.

Төв Европын томоохон улс орнуудын нэг бол Польш юм.

• 38 сая хүн амаараа Европын Холбоонд тавдугаарт бичигддэг
• 312,722 хавтгай дөрвөлжин километр талбайтай газар нутгаараа Европ тивийн ес дэх том улсад тооцогддог
• 2021 оны байдлаар дотоодын нийт бүтээгдэхүүний (nominal) хэмжээ $674 тэрбум буюу нэг хүнд оногдох хэмжээ нь $17,840 хүрсэн байна
• PPP аргаар тооцоолсон дотоодын нийт бүтээгдэхүүний хэмжээ 2021 оны байдлаар $1.42 их наяд буюу нэг хүнд оногдох хэмжээ $43,480 болсон байна
• Хүнд аж үйлдвэр, түүн дотроо гангийн болон машин механизм, хөлөг онгоцны үйлдвэрлэл эдийн засгийн гол тулгуур нь болдог
• 2018 онд Польш улс хөгжиж буй орны ангиллаас хөгжингүй орны ангилалд шилжиж байжээ
• 2021 оны байдлаар ажилгүйдлийн түвшин 2.9 хувьтай байсан нь Европын Холбооны орнууд дотроос хоёрдугаарт орох бага үзүүлэлт юм
• Ажиллах хүчний 61 хувь нь үйлчилгээний салбарт, 31 хувь нь аж үйлдвэрийн салбарт, 8 хувь нь хөдөө аж ахуйн салбарт оногддог
• Төв Европын топ 500 компанийн 40 хувь нь Польш улсад бүртгэлтэй байдаг
• Польш улс нь банкны салбарын хөгжлөөр бүс нутагтаа тэргүүлдэг бөгөөд 100,000 хүн тутамд 32.3 банкны салбар оногддог байна
• Бараа бүтээгдэхүүн, үйлчилгээний экспортын хэмжээгээрээ дэлхийд 20 дугаарт жагсдаг улс юм. 2020 оны байдлаар нийт экспортын хэмжээ нь дотоодын нийт бүтээгдэхүүнийхээ 56 хувийг бүрдүүлж байжээ

Эх сурвалж: Investopedia