Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэлийн авто замын түгжрэлийг бууруулахын тулд зарим уулзварыг нэг чигийн хөдөлгөөнтэй болгох туршилт хийх гэж байгаагаа өнгөрсөн долоо хоногт холбогдох албанаас зарласан. 

Замын Хөдөлгөөний Удирдлагын Төв(ЗХУТ)-ийн Хөдөлгөөн зохицуулалт хяналтын хэлтсийн дарга Н.Намуу Баасан гарагт энэ талаар мэдээлэл өгөхдөө "Алтай хотхоны оршин суугчид хүүхдээ хүргэж өгөхийн тулд өглөө, оройн ачааллын үеэр буцаж эргэдэг. Буцаж эргэх үйлдэл нь бусад хөдөлгөөнийг огтлолцуулж, аюулгүй байдал хангахгүйгээс шалтгаалж маш их эрсдэл үүсээд байна. 

Иймд Алтай хотхонд шинээр замын тэмдэг тэмдэглэгээний ажлууд хийгдэж байгаа. Алтай хотхоны оршин суугчид хүүхдээ сургуульд хүргэхийн тулд уулзварын голд буцаж эргэхгүй, нийтийн эрх ашгийг хөндөхгүйгээр зарим зохицуулалтыг хийж байна. 

Нарны гүүрний доод талын буцаж эргэх хөдөлгөөнийг нэг чигийн хөдөлгөөнтэй болгож байгаа" гэсэн юм. 

"Хүүхдийн зорчих эрх хороолол дотроо аюултай боллоо"

Тэгвэл үүнийг Нарны хороолол болон ойролцоох хотхоны оршин суугчид эсэргүүцэж буйгаа өнөөдөр илэрхийлэв.

Иргэдийн хэлж буйгаар уг зохицуулалтыг хэрэгжүүлбэл хүүхдүүдийн эрүүл, аюулгүй орчинд амьдрах эрх хөндөгдөж, сургууль, цэцэрлэгтээ явахад нь эрсдэл үүсэж болзошгүй хэмээн үзэж байгаагаа хэвлэлд өгсөн ярилцлагадаа онцолсон.

Оршин суугчид "Иргэдийн амь нас, эрүүл мэнд, аюулгүй байдлаар туршилт хийж болохгүй", "Хүүхдийн зорчих эрх хороолол дотроо аюултай боллоо", "Машинаа бодсон бол хүнээ бас бодолцож шийдвэрээ гаргана уу", "Нэг хороолол дундуур нөгөө хорооллын иргэд дамжин өнгөрөх нь зөв шийдэл биш" гэх зэрэг бичиг барьж, эсэргүүцлээ илэрхийллээ. 

Харин иргэд энэхүү туршилтыг хийлгэхгүй, эсэргүүцсээр байх болно гэдгээ илэрхийлцгээж байна. Нарны хороолол гурван орц, гарцтай. Нэг нь Нарны гүүрний зүүн талын гарц бөгөөд нэг чигийн хөдөлгөөнд оруулбал үүгээр автомашинууд орж, хотын төвийг зорих тохиолдолд Нарны хорооллын дундуур явахаас өөр аргагүй гэдгийг оршин суугчид хэллээ. 

ФОТО: