Х.Булгантуяа: Хүүхдэдээ шүгэл авч өгөх нь үнэтэй, зардал ихтэй зүйл биш
УИХ дахь хүчирхийллийн эсрэг лобби бүлэг болон УИХ дахь эмэгтэй гишүүдийн бүлгээс хүүхэд хамгааллын “Шүгэл” төслийг эхлүүлжээ.
Хүчирхийлэлд өртөх болон эрсдэлтэй нөхцөлд орсон үедээ шүгэл үлээж бусдаас яаралтай тусламж гуйх нь дэлхий дахинаа ашиглагддаг үр дүнтэй аргад тооцогддог байна.
УИХ-ын гишүүн Х.Булгантуяа “Хүүхдийн хүчирхийллээс гадна хүүхэд осол гэмтэл, байгалийн гамшигт өртөх, үе тэнгийн дээрэлхэлт зэрэг асуудлууд захын хорооллуудад буурахгүй байгаа тоон үзүүлэлт байна.
Тиймээс хүүхэд хүчирхийлэлд өртсөний дараа очиж тусалдаг биш асуудал гарахаас нь өмнө мэдэж тусалдаг болох хэрэгтэй байна.
Хүүхдүүдийн хувьд тусламж шаардлагатай үед хэрхэн яаж тусламж авахаа мэддэггүй. Хүүхдийн хүчирхийллийн 108 дуудлагын утас байгаа хэдий ч хүүхэд болгон утасгүй, сандарсан үед дуудлага өгч амжилгүй хүчирхийлэлд өртөх, нохойд хазуулах, осол гэмтэлд өртөх магадлал өндөр байна.
Айсан үед зарим тохиолдолд хүний дуу гарахгүй, хөдөлж чаддаггүй. Энэ үед ашиглах нэн тэргүүний хамгийн үр дүнтэй арга нь шүгэл юм.
Хүүхдийн хүчирхийлэл болоод байгаа гэдгийг багш, хажуу хөрш айл нь мэдээгүй жишээнүүд олон байдаг. Тиймээс хүүхдүүдийн хувьд хүчирхийлэлд өртсөн үед тусламж дуудах нь нэн түрүүний асуудал байна.
Хүүхдэдээ шүгэл авч өгөх нь үнэтэй, зардал ихтэй зүйл биш. Энэ нь хүүхэд бие хамгаалах маш том хэрэгсэл” гэлээ.
УИХ-ын гишүүн Б.Баярсайхан ”Шүгэл төслийг бид цааш үргэлжлүүлж өсвөр насны хүүхдүүдийн гар утсанд аппликэйшн суулгах зэргээр өөр байдлаар тусламж дуудах хэлбэрийг судалж байгаа.
Хүүхэд шүглээ хэрэглээд сурчихна. Харин томчууд бид шүглийн дууг сонссон үедээ тухайн хүүхдэд тусламжийг бодитойгоор хүргэж эцэг эх, багш, хууль хяналтын байгууллага, эмнэлэгт хүргэж өгч чадах уу гэх асуудал нь томчууд бидний хүлээсэн үүрэг болж байна” гэлээ.
“Хүүхдийн амь нас, эрүүл мэндийг хохироосон хэргүүд дээр эрүүгийн хуулийг чангатгана”
УИХ дахь хүчирхийллийн эсрэг лобби бүлэг болон УИХ дахь эмэгтэй гишүүдийн бүлгээс гэр бүлийн тухай хуулийг батлуулах, хүүхэд хамгааллын тухай хуулийн шинэчилсэн найруулгын төслийг УИХ-аар нэн яаралтай хэлэлцүүлэх, цахим орчинд хүүхдийн эрхийг хамгаалах тухай хуулийг хэлэлцүүлнэ.
Мөн хүчирхийлэлтэй тэмцэж байгаа нийгмийн ажилтнуудын эрхзүйн орчин огт хангалтгүй байгаатай холбоотой нийгмийн ажлын тухай хуулийг батлуулах, архидан согтуурч хүүхдийн амь нас, эрүүл мэндийг хохироосон хэргүүдэд эрүүгийн хуулийг чангатгахаар ажиллаж байгаа аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
31 СЭТГЭГДЭЛТЭЙ
|
