Ч.Даваахишиг: Бурхан багшийн Их дүйчин өдрийг угтан 14-25 насныхны дунд ТикТок видео бичлэгийн уралдаан зарлаж байна
Бурхан багшийн Их дүйчин өдрийг зургаадугаар сарын 14-ний Мягмар гарагт тэмдэглэнэ. Энэ өдрийг угтан Гандантэгчэнлин хийдээс хүүхэд багачуудад зориулсан өдөрлөг болон олон нийтэд нээлттэй эрдэм шинжилгээний хурал зохион байгуулах талаар өнөөдөр мэдээлэв. Тодруулбал тавдугаар сарын 28-нд буюу маргааш Гандантэгчэнлин хийдийн Батцагаан дуганы "А" танхимд эрдэм шинжилгээний хурал болох аж.
Хүүхэд багачуудад зориулсан өдөрлөгийн талаар Жавзандамба хутагт төвийн менежер Ч.Даваахишиг мэдээлэл өгсөн юм. Тэрбээр "Бурхан багшийн их дүйчин өдрийг 23 дахь жилдээ тэмдэглэх гэж байна. Энэ хүрээнд 14-25 насны хүүхэд, залуусын дунд “Ёс суртахууныг түгээе, бие биедээ тусалъя” уриатай ТикТок видео бичлэгийн уралдаан зарлаж байгаа. Залуу хойч үедээ бурхан багшийн ёс суртахууныг өвлүүлэх зорилготой тус уралдаан 10 сая төгрөгийн шагналын сантай. Тухайлбал
- Нэгдүгээр байр дөрвөн сая төгрөг
- Хоёрдугаар байр хоёр сая төгрөг
- Гуравдугаар байр нэг сая төгрөг бөгөөд тусгай байранд зургаан оролцогчийг шалгаруулж тус бүр 500 мянган төгрөгөөр урамшуулна.
"Энэ уралдааны зорилго нь ёс суртахууныг хүүхэд залууст таниулахад оршиж байгаа. Тиймээс ч ТикТок бичлэгээр дамжуулж нийтийн ёс суртахуун яаж зөв тал руу нь өөрчилж, эргэлт авчрах гэх мэтчилэн агуулгаар хийх боломжтой" хэмээн хэллээ. Уралдаанд оролцох хүсэлтэй иргэд зургаадугаар сарын 10-ны өдрийг хүртэл видеогоо хувийн хаягтаа байршуулна. Бичлэгийнхээ линкийг Жавзандамба төв хутагт мэйл хуудас руу явуулна гэдгийг зохион байгуулагчид хэлэв.
"Ёс суртахуун гэдэг бол тийм хүнд сэдэв биш. Өөрсдийн хүсэж байгаа иргэндээ ээлтэй, тэгш үйлчилдэг нийгмээ захиалаад видео контентод ур ухаанаа уралдуулж оролцоорой" хэмээн тэдний зүгээс уриаллаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
