Гадаад худалдаа 1.6 тэрбум ам.долларын ашигтай гарлаа

2020 оны эхний арван сарын дүнгээр гадаад худалдааны нийт бараа эргэлт 10,423.1 сая ам.доллар болж, 2019 оны мөн үеэс 1,170.1 сая ам.доллар буюу 10.1%-аар буурсныг Гаалийн ерөнхий газраас мэдээллээ. 

Харин экспортын дүн импортын дүнгээс 1,549.1 сая ам.доллараар давж, гадаад худалдааны тэнцэл эерэг гарчээ. 

Экспортод 5,986.1 сая ам.долларын бараа, түүхий эд гаргасан нь өнгөрсөн оны мөн үетэй харьцуулахад 8.3%-аар буурсан байна.

Экспортын барааны нийт дүнгээс харвал 

• Эрдэс бүтээгдэхүүн 4,228.0 сая ам.доллар буюу 70.6 хувь
• Сувд, үнэт ба хагас үнэт чулуу, үнэт металл, гоёлын зүйлс бүлэгт багтах барааны экспорт 1,324.4 сая ам.доллар буюу 22.1%
• Арьс ширэн түүхий эд болон боловсруулсан арьс, шир, ангийн үс, эдгээрээр хийсэн эдлэл 6.9 сая ам.доллар буюу 0.1%
• Нэхмэл болон нэхмэл бүтээгдэхүүн 254.3 сая ам.доллар буюу 4.2% ба эдгээр нь нийт экспортын дүнгийн 97%-ийг эзэлж байна. 

2020 оны эхний 10 сард боловсруулаагүй нефть, төмрийн хүдэр, зэсийн баяжмал болон цайрын баяжмалыг 100%, чулуун нүүрсний 95.2 хувийг БНХАУ-д, жоншны 76.2%-ийг БНХАУ-д, 23.5%-ийг ОХУ-д, үхэр адууны боловсруулсан болон боловсруулаагүй ширний ихэнх хувийг БНХАУ-д, самнасан ноолуурын 80.5%-ийг Итали-д, ямааны угаасан ноолуурыг 100% БНХАУ-д экспортолсон байна. 

Боловсруулаагүй буюу хагас боловсруулсан алтны экспорт: 

•  Их Британид- 4.1% 
• Сингапурт- 4.8%
• Швейцарт- 91.1%-ийг тус тус экспортолж, дээрх нэрийн бараа нь экспортын нийт дүнгийн 92.6%-ийг эзэлж байгаа аж. 

Импортоор нийлүүлэгдсэн барааны нийт дүнд

• Машин механик тоног төхөөрөмж ба эд анги, цахилгаан хэрэгсэл, тэдгээрийн сэлбэг 904.8 сая ам.доллар буюу 20.4%
• Эрдэс бүтээгдэхүүн 807.6 сая ам.доллар буюу 18.2 хувь (үүний дотор нефтийн бүтээгдэхүүн 647.4 сая ам.доллар буюу 80.2%) 
• Мал амьтан, ургамлын гаралтай бүтээгдэхүүн, хүнсний зүйл 545.8 сая ам.доллар буюу 12.3%
• Авто агаарын тээврийн хэрэгсэл тэдгээрийн эд анги 735.4 сая ам.доллар буюу 16.6%
• Үндсэн төмөрлөг болон түүгээр хийсэн бүтээгдэхүүн 478.6 сая ам.доллар буюу 10.8%
• Химийн болон түүнтэй холбоотой үйлдвэрийн бүтээгдэхүүн 304.3 сая ам.доллар буюу 6.9%-ийг тус тус эзэлж, эдгээр бүтээгдэхүүнд нийт дүнгийн 85.2 хувь ногдож байна.