Ардын хувьсгалаас хойшх анхны Монгол лхаарамбаар Д.Жавзандорж тодорлоо
Монголд ардын хувьсгалаас хойш анх удаа Лхаарамба цолтон төрсөн талаар "Сумади Гирди" төвөөс өнөөдөр хэвлэлийн бага хурал хийлээ.
Сүхбаатар аймгийн бурхан шашны төв Эрдэнэмандал хийдийн дэд хамба Н.Цамбанүрдэв "Бурхны шашин дотроо таван бага ухаан, таван их ухаан гэж байдаг. Буддын гүн ухааны таван ботийг 16 жилийн хөтөлбөртэйгөөр суралцаж дүүргэн лхаарамбын шалгалтад орох эрх авдаг.
Энэтхэгт гүн ухаанаар суурилж суралцдаг Гэлүгбийн найман сургуулийн 10,000 орчим лам бий. Үүнээс шилэгдсэн лам нартай бүтэн зургаан жилийн турш өрсөлдөн шалгалт өгч байж лхаарамба цол авдаг. Тэгэхээр энэ нь эгэл жирийн бидний санаанд багтамгүй гайхамшигтай хөдөлмөр, оюун ухааны хүч. Лхаарамба цолыг хэн болгон авдаггүй.
Бидний багш Д.Жавзандорж дээдэс зургаан жилийн дөрвөн жилд нь шалгалтдаа тэргүүлж, хоёр жилд нь дэд байранд орсон байдаг. Ийнхүү Монгол Улсынхаа нэр хүндийг өндөрт өргөж чадсан. Энэ талаар дэлхий нийтээр ярилцаж байна.
Багш маань 11 настайгаасаа лам болж, 1991 онд Сүхбаатар аймгийн Эрдэнэмандал хийдэд шавилан бурхны ном үзэж эхэлсэн. Улмаар Улаанбаатар хотод Зүүн хүрээ Дашчойлин хийд, Гандантэгчилэн хийдийн Дашчоймпил дацанд Буддын гүн ухаанд суралцсан" гэлээ.
Егүзэр хутагтын 5 дугаар дүр Данзанлувсанванжал "Энэ жил монголчуудын хувьд их сайхан жил болж байна. Лхаарамба цолыг тэргүүн байрт шалгарч олж авсан нь багшийн хэрхэн хөдөлмөрлөснийг харуулж байна.
Багш маань бидэнд ном яаж үзэхийг заахаас гадна өөрийн биеэр үлгэрлэн үзүүлдэг байсан. Өдөр болгон тасралтгүй номын ухаанд өөрийгөө зориулж ирсэн.
Мөн Далай багшийн 80 насны ойгоор олон ном цээжилсэн ламыг шалгаруулахад тодорсон хоёр хүний нэг нь лхаарамба Д.Жавзандорж байсан. Ийнхүү багш маань лхаарамба цол хүртсэнд туйлын баяртай байна" гэсэн юм.
