"Төрийн албанаас 22,235 иргэн халаа сэлгээнд өртөж, 14,000 нь ажлаасаа халагдсан байна"

 

“Тогтвортой ажлын байр” ТББ-аас хууль бусаар ажлаасаа халагдсан 30,000 хүний эрх ашгийг хамгаалах талаар өнөөдөр Үндэсний мэдээллийн төвд хэвлэлийн бага хурал хийлээ.

2016 оны УИХ-ын сонгуулиас хойш 22,235 мэргэшсэн төрийн албан хаагч ажлаасаа халагдаж солигдсон тоо байна.

Энэ халаа солионд Хөдөлмөрийн болон Төрийн албаны тухай хууль бусад хууль тогтоомжийн дагуу тавигдах шаардлага шалгуурыг ханган мэргэшсэн, ажлын дадлага туршлагатай 25-55 насны төрийн албан хаагчид өртсөн байна.

 

“Тогтвортой ажлын байр” ТББ-ын тэргүүн Н.Тэгшбаяр “Өнөөдөр төрийн алба төрлийн алба болсон байна. Ар, өврийн хаалгаар ажил албан тушаалд очдог болж.

Хэдхэн сарын дараа төрөх гэж байгаа эмэгтэйг, хэдхэн хоногийн дараа тэтгэвэрт гарах гэж байгаа ажилдаа сэтгэл зүрхээ зориулсан хүнийг ажлаас нь халчих юм.

Энэ бүгдийн эрх ашгийг бид хамгаалах болно” хэмээв.

 

В.Уранчимэг “Бид ажлаасаа халагдсан хүмүүсийн эрх ашгийг хамгаалах зорилготойгоор эвлэлдэн нэгдсэн. Төрийн албанаас 22,235 иргэн халаа сэлгээнд өртөж, 14,000 албан хаагч ажлаасаа халагдсан байна.

Эдийн засаг, сэтгэл санааны хүнд дарамтад орсон 14,000 иргэний эрх ашгийг хамгаалах зайлшгүй шаардлагатай байна” гэв.

Халагдсан иргэдийн хохирлыг цалингийн дундаж хэмжээгээр тооцвол сард 5,000 өрх 10 гаруй тэрбум төгрөгийн өрхийн орлогоо алджээ.

Албан тушаалын авлигын золиос болж, ажлаас халагдаж, амьдралын баталгаагүй болсон иргэдийг нэгдэж, эрхээ хамгаалахыг уриаллаа.