₮11.7 тэрбумын төсөвтэй Нисэхээс Нүхт хүртэлх хоёр километр авто замыг намар ашиглалтад оруулахаар төлөвлөжээ
Архивчдын гудамж буюу Нисэхийн авто замаас шинэ суурьшлын бүс дэх Нео сити хотхоныг дайран өнгөрч Нүхтийн авто зам хүртэлх дөрвөн эгнээ бүхий 2 километр авто замыг барих ажил эхэлжээ. Авто замын хоёр талд 2 метр өргөн явган хүний зам барихаас гадна гэрэлтүүлэг, борооны ус зайлуулах шугам угсрах аж.
Барилгын ажил хэзээ дуусах тухай Нийслэлийн Замын Хөгжлийн Газрын Зам барилгын хяналтын хэлтсийн ахлах мэргэжилтэн Б.Түшиг-Эрдэнэ “Нисэхээс Нүхт хүртэлх 2 километр авто зам барих ажлын гүйцэтгэгчээр “Баруун бүсийн зам засвар, арчлалтын газар” ОНӨААТҮГ шалгарч, дөрөвдүгээр сарын 28-ны өдөр авто замын тэг тэнхлэг хүлээлцлээ. Ийнхүү газар шорооны ажлыг эхлүүлээд байна.
Уг авто замыг наймдугаар сарын 30-ны өдөр ашиглалтад оруулахаар төлөвлөж буй” гэв.
Авто зам ашиглалтад орсноор Яармаг, Нисэх орчмын түгжрэлийг бууруулахаас гадна Нисэхийн авто замаас Нүхтийн авто зам руу хүрч, цаашлаад Эрчим хүчний гудамж руу хүрэх өргөн коридор үүсэх ач холбогдолтой байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
