Хог шатааж, эрчим хүч үйлдвэрлэх төслийн ТЭЗҮ-ийг Дулаан техник, үйлдвэрлэлийн экологийн хүрээлэн боловсруулжээ
Улаанбаатар хотын хог хаягдлын менежментийг сайжруулах зорилгоор “Хог шатааж, эрчим хүч үйлдвэрлэх” төслийг 2026-2029 онд хэрэгжүүлэхээр төлөвлөжээ.
Тус үйлдвэр өдөрт 1,500 тонн хог хаягдал шатааж, жилдээ 210 сая кВт цаг буюу 35 МВт цахилгаан эрчим хүч үйлдвэрлэх тооцоололтой. Энэ нь ойролцоогоор жилд 1.5 сая тонн хатуу хог хаягдлыг боловсруулж, 2,300 орчим өрхийг цахилгаанаар хангана гэсэн үг юм. Төслийн ТЭЗҮ-ийг "Дулаан техник, үйлдвэрлэлийн экологийн хүрээлэн" боловсруулж, 2025 оны тавдугаар сард Эрчим хүчний яамны Шинжлэх ухаан, технологийн зөвлөлөөр дэмжин хүлээн авсан байна. Үйлдвэрийн түншлэлийн төслийн зураг төсөл, төсвийг боловсруулах, барих, ашиглах, шилжүүлэх төрлийн урьдчилсан шалгаруулалтын сонгон шалгаруулалтыг зарлажээ. Төслийн хүрээнд нийт 158 нэгж талбар чөлөөлөхөөс 123-ыг чөлөөлсөн байна.
Морингийн даваанд баригдах үйлдвэр ашиглалтад орвол хогийн цэгүүдийн ачааллыг бууруулах, ил задгай булж устгах аргаас татгалзах, хог хаягдлыг эдийн засгийн эргэлтэд оруулах, хог булшлах талбайг үе шаттай нөхөн сэргээн ногоон байгууламж байгуулж, барилгажилтад ашиглах ач холбогдолтой аж.
Эх сурвалж: НЗДТГ-ын хэвлэлийн хэлтэс
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
