Крымийн хойгийг Орост алдахыг зөвшөөрөхгүй байгаа Зеленский “дайныг сунжруулж байна“ хэмээн Трамп шүүмжлэв

Украины ерөнхийлөгч Володимир Зеленский өөрийн эзлэгдсэн нутаг Крымийн хойгийг Орос улсад алдахыг зөвшөөрөхгүй байгаа нь “энх тайван тогтоох үйл явцад саад учруулж байна” хэмээн АНУ-ын ерөнхийлөгч Дональд Трамп шүүмжилжээ.

Дайныг дуусгах гэрээ байгуулахад “маш ойрхон” болсон ч АНУ-ын тулгаж буй нөхцөлийг Зеленский хүлээн зөвшөөрөхгүй байгаа нь “хямралыг сунжруулахаас өөр ямар ч ач холбогдолгүй” гэж Трамп өчигдөр сошиал хуудсандаа энэ талаар шүүмжлэн бичсэн байна.

Трампын мэдэгдлийн өмнө АНУ-ын дэд ерөнхийлөгч Жэй Ди Вэнс “газар нутгийг өнөөдрийн фронтын шугамын дагуу хуваах байдлаар гал зогсоох” нь Вашингтоны санаачилсан энхийн гэрээний үндэс болохыг мэдэгджээ.

Киевийн эрх баригчид 2014 онд ОХУ-д хүчээр нэгтгэгдсэн Крымийн хойгийг буцааж авах байр суурийг тууштай баримталсаар ирсэн юм.

Вэнсийн мэдэгдлийн дараа Зеленский “Крымийг өгөх талаар ямар ч яриа байхгүй. Энэ бол манай үндсэн хуультай зөрчилдөх санаа” гэж мэдэгджээ.

Зеленский мэдэгдэлдээ 2018 онд тухайн үеийн АНУ-ын төрийн нарийн бичгийн дарга Майк Помпеогийн бичсэн “Крымийг булаан авсан Оросын үйлдлийг Вашингтон хүлээн зөвшөөрөхгүй” гэсэн утгатай захидлыг хавсаргасан байна.

Сонгуулийн турш Трамп дөрөв дэх жилдээ үргэлжилж буй Украины дайныг 24 цагийн дотор дуусгахаа амлаж байсан ч өнөөдөр түүний бүрэн эрхийн хугацаа 100 дахь хоногтоо ойртож байхад үр дүн гараагүй байгаа.

Трампын мэдэгдлийн дараа Цагаан ордны хэвлэлийн төлөөлөгч Каролин Ливит “Ерөнхийлөгч бухимдаж байна. Түүний тэвчээр барагдахад ойрхон байгаа” гэж хэлжээ.

Дэд ерөнхийлөгч Вэнс хэрвээ Украин-Оросын энхийн гэрээ үр дүнд хүрэхгүй удвал АНУ зуучлагчийн үүргээсээ татгалзахад бэлэн байгааг анхааруулсан нь Трампын өнгөрсөн долоо хоногт хэлсэн үгийг дахин бататгасан хэрэг байлаа.

Энэ долоо хоногт Лондонд болсон Их Британи, Франц, Герман, Украин, АНУ-ын уулзалтад төрийн нарийн бичгийн дарга Марко Рубио, Трампын тусгай элч Стив Виткофф нар оролцоогүй нь нөхцөл байдлыг улам бүрхэг болгоод байна.

Тэдний оронд Украиныг хариуцсан Трампын төлөөлөгч, генерал Кит Кэллог уулзалтад оролцож, түүнээс илүү өндөр статустай Виткофф дөрөв дэх удаагаа Путинтэй уулзахаар Москваг зорьсон юм.

Их Британийн дипломатичд Рубио, Виткофф нар яагаад эцсийн мөчид төлөвлөгөөгөө өөрчилж, Лондонд ирээгүй талаар тодорхой мэдээлэлгүй байгаагаа илэрхийлсэн байна.

АНУ-ын төрийн департамент үүнийг ложистикийн асуудлаас болсон гэж тайлбарласан нь үнэмшилтэй сонсогдохгүй байгаа юм.

Лхагва гарагт Оросын арми Украины эсрэг агаарын цохилтоо үргэлжлүүлж, зүүн бүсийн Марганец хотод ажилчдын автобусыг дроноор довтолсны улмаас есөн хүний амь үрэгджээ.

Эх сурвалж: BBC