"Үндэсний Цэцэрлэгт Хүрээлэнд тагтаа хооллох хориотой" гэв

Гэрэл зургийг MPA агентлагийн онцгой зөвшөөрөлтэйгөөр ашиглав

Баянзүрх дүүргийн нутаг дэвсгэрт байрлах Үндэсний Цэцэрлэгт Хүрээлэнд/ҮЦХ/ тагтаа хооллох хориотой хэмээн уриалга гаргажээ.

Уриалгад "Хүрээлэнд амарч зугаалж буй зарим иргэн тагтаа хооллож байгаа нь цэцэрлэгт хүрээлэнд тагтаа үүрлэх нөхцөлийг бүрдүүлж, тоо толгой нь хэвийн хэмжээнээс ихсэх, өд сангас нь хүрээлэн буй орчныг бохирдуулснаас тоосонцор үүсгэж, ханиад томуу дэгдээх, харшил үүсгэх шалтгааныг нэмэгдүүлж байна.

Тиймээс Үндэсний Цэцэрлэгт Хүрээлэнгээ иргэн бүр хайрлаж, энэ мэт үйлдэл гаргахгүй байхыг уриалж байна" гэжээ.

 

Өнгөрсөн оны арваннэгдүгээр сард тус хүрээлэнгийн хашаанд адуу мал оруулж мод, ногоон байгууламжийг сүйтгэх явдал гарч, зүүн урд талын хаалгыг хаагаад байгаа билээ.

Үндэсний Цэцэрлэгт Хүрээлэнгийн талбайд 32 зүйлийн 148,000 ширхэг мод сөөг 98.5 хувийн амьдралтай ургадаг байна.

Дулааны улиралд өдөрт дунджаар 12-15 мянган, хүйтний улиралд 6-9 мянган хүн тус цэцэрлэгт хүрээлэнд зочилдог аж.