“Тавантолгой түлш”-ийг нийслэлийн өмчид шилжүүлэхдээ “Эрдэнэс Тавантолгой” компанийн төрд ногдох хувьцааны ногдлоор өрийг нь барагдуулна гэв
Аж үйлдвэржилтийн бодлогын байнгын хорооны хуралдаанаар УИХ-ын гишүүн Л.Мөнхбаясгалангаас Монгол Улсын Ерөнхий сайдад хандаж тавьсан “Тавантолгой түлш” ХХК-ийн үйлдвэрлэлийн үйл ажиллагааны талаарх асуулгатай холбоотой мэдээллийг хэлэлцлээ.
УИХ-ын ээлжит бус чуулганаар "Тавантолгой түлш" ХХК-ийг нийслэлийн өмчид шилжүүлэх асуудлыг хэлэлцэх шийдэх байсан ч тус компани өртэй гэдэг шалтгаанаар уг асуудлыг хойшлуулсан. Энэ талаар тодруулсан гишүүдийн асуултад "Тавантолгой түлш" ХХК-ийн Гүйцэтгэх захирлыг түр орлон гүйцэтгэгч Ц.Лхагвасүрэн дараах хариултыг өглөө.
Тэрбээр “Тавантолгой түлш компани нь байгуулагдсан цагаасаа “Эрдэнэс Тавантолгой” компаниас санхүүжиж ирсэн. Одоогийн байдлаар 1.25 их наяд төгрөгийн өртэй байна.
“Тавантолгой түлш” компанийг нийслэлийн өмчид шилжүүлэхдээ “Эрдэнэс Тавантолгой” компанийн төрд ногдох хувьцааны ногдлоор өрийг барагдуулна гэдэг урьдчилсан мэдээлэлтэй байгаа. Гэхдээ одоогоор шийдэгдээгүй байна.
Өвөлжилтийн бэлтгэлийн тухайд, өнөөдрийн байдлаар нийслэлийн агуулахуудад 85 мянган тонн нөөцтэй, урсгал засварын ажил 100 хувь хийгдэж дууссан. Түүхий эд, бараа материал 2-3 сарын нөөцтэй, өвөлжилтөд бэлэн байгаа" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
14 СЭТГЭГДЭЛТЭЙ
|
