Улаанбаатарын замын түгжрэлийг бууруулах чиглэлээр Италийн төрийн өмчит “Леонардо” компанитай хамтран ажиллах хүсэлт гаргажээ

Нийслэл хотод метрог барьж байгуулах, шинэ тойрог замын сүлжээг бий болгох, гэр хорооллын дахин төлөвлөлт буюу орон сууцжуулах, ногоон байгууламжийг нэмэгдүүлэх зэрэг томоохон төслүүдийг төсвийн болон төр, хувийн хэвшлийн түншлэлийн зарчмаар үе шаттай хэрэгжүүлэхээр төлөвлөж буй. Энэ хүрээнд Улаанбаатар хотын авто замын түгжрэлийг бууруулах чиглэлээр Итали улсын төрийн өмчит “Леонардо” компанитай хамтран ажиллах хүсэлтэй байгаагаа илэрхийлжээ.

“Леонардо” компани нь агаар болон сансрын, батлан хамгаалах, аюулгүй байдлын салбарт олон талт технологийн чадавхыг бий болгодог дэлхийн аж үйлдвэрийн групп. Дэлхийн 150 оронд үйл ажиллагаа явуулдаг тус компани Итали, Их Британи, Польш, АНУ-ын аж үйлдвэрийн салбарт томоохон байр суурь эзэлдэг байна. 

Нийслэлийн Засаг даргын нэгдүгээр орлогч Т.Даваадалай Бүгд Найрамдах Итали Улсаас Монгол Улсад суугаа Онц бөгөөд Бүрэн эрхт Элчин сайд Жованна Пиккаррэта болон Итали улсын төрийн өмчит “Леонардо” компанийн Зүүн Хойд Ази, далайн бүс нутаг дахь Бизнесийн хөгжлийн асуудал хариуцсан дэд ерөнхийлөгч Анжело Чеккини тэргүүтэй төлөөлөгчдийг хүлээн авч уулзах үеэрээ Улаанбаатар хотын авто замын түгжрэлийг бууруулах чиглэлээр хамтран ажиллах хүсэлтийг тавьжээ.

Тус улсаас Монгол Улсад суугаа Онц бөгөөд Бүрэн эрхт Элчин сайд Жованна Пиккаррэта цаашид хоёр талын хамтын ажиллагааг бэхжүүлэх чиглэлд бүхий л талаар дэмжлэг үзүүлж, хамтран ажиллахдаа таатай байх болно гэдгээ илэрхийлсэн байна.