Бразилд дотоодын зорчигч тээврийн нисэх онгоц осолдсоны улмаас 61 хүн амиа алдав

Баасан гарагийн үдээс хойш Бразил улсын Сан Пауло хотын ойролцоо дотоодын зорчигч тээврийн нисэх онгоц осолдож, уг онгоцонд явсан бүх 61 хүн амиа алджээ.

Парана мужийн Каскавел хотоос хөөрсөн Voepass компанийн энэ онгоц Сан Пауло хотын олон улсын нисэх буудалд газардах хуваарьтай байсан юм.

Гэвч Сан Паулогоос баруун хойд зүгт 80 км-ийн зайд нисэж байхдаа унажээ.

ATR үйлдвэрийн онгоц иргэдийн суурьшлын бүсэд тэнгэрээс эргэлдэн унасны дараа их хэмжээний хар утаа олгойдож буйг харуулсан дүрс бичлэг сошиал орчинд тарсан байна.

Тухайн үед ослын газарт үзэгдэх орчин тунгалаг, зөөлөн бороотой, салхины хурд 10 км/цаг байжээ.

Онгоцонд явсан зорчигчдоос амьд хүн үлдээгүй, нэг орон сууц сүйдсэн боловч оршин суугчдын амь нас хохироогүйг осол болсон Винедо хотын захиргаа мэдээлсэн байна.

Олон нийтийн арга хэмжээнд оролцож байсан Бразилын ерөнхийлөгч Луйз Инасио да Силва ослын талаар мэдээ хүлээж авсныхаа дараа хохирогчдын ар гэрийнхэнд эмгэнэл илэрхийлж, нэг хором дуугаа хураан хүндэтгэл үзүүлжээ.

Одоогоор онгоцны ослын шалтгаан тодорхой болоогүй байна.

Францын Airbus, Италийн Leonardo компаниудын хамтран эзэмшдэг ATR компани 40-70 хүний суудалтай дотоодын зорчигч тээврийн нисэх онгоцнуудыг үйлдвэрлэдэг.

Тус компанийн удирдлага Бразилд болсон ослын шалтгааныг тогтооход хамтран ажиллаж байгаагаа мэдэгджээ.

Онгоцыг өмчлөгч Voepass компани зах зээлийн хэмжээгээр Бразилын дөрөв дэх том агаарын тээвэрлэгч юм.

Сан Пауло мужийн Рибейрао Прето хотод төвтэй тус компани дан ATR-72, ATR-42 загварын онгоцнуудтай бөгөөд Бразилын дотоодын 50 орчим чиглэлд тогтмол нислэг үйлддэг юм байна.

Эх сурвалж: Reuters