О.Баасанхүү: Мэтгэлцээндээ миний хэдэн нөхөд хурдан хүрээд ир. Бодлогоор сайхан мэтгэлцье
УИХ-ын сонгуулийн 10 дугаар тойрог буюу Сүхбаатар, Чингэлтэй дүүрэгт Монгол Ардын Нам(МАН)-аас нэр дэвшигчид сонгуулийн сурталчилгаа явуулах үедээ хууль зөрчиж, илтэд гүтгэн харлуулах үйл ажиллагаа явуулж буй талаар Ардчилсан Нам(АН)-аас нэр дэвшигчид мэдээлэл өглөө.
Нэр дэвшигч О.Баасанхүү "Сонгуулийн сурталчилгаа энэ долоо хоногийн Лхагва гарагт дуусна. Сурталчилгаа эхэлснээс хойш өнөөдрийг хүртэл хүн ярихгүй хөгжил ярья. Нам ярихгүй бодлого ярья гэх уриатай явж байгаа.
Тэр утгаараа зөв бодлого, шийдлээр мэтгэлцье. Аль ч нам яллаа гэсэн ард түмэн хожих ёстой. Гэтэл харамсалтай нь хуучин бидний нэрлэдэг "тролл" цахим сүлжээний сэтгэгдлийн хэмжээнд байсан бол одоо зарим нэг намын хэмжээнд очлоо.
Бидэнд ирсэн албан бус мэдээллээр дэлгүүр болон зарим газраар 300 мянган төгрөг тараахаар бэлдээд явж байна. Ард түмэн минь мөнгө нь таных шүү. Өөрийнхөө мөнгийг аваад сонголтоо өөрөөр хийгээрэй.
МАН мөлхөө сурталчилгаа гэж нэрлээд буй хаалт дотор "цэвэр мөнгө" тараалтдаа найдаж байгаа гэдгийг хариуцлагатайгаар хэлье.
Тийм учраас шалдар булдар хэрүүл өдсөн, хүмүүсийг гүтгэсэн байдалтай, сурталчилгааны алтан цагаас хулгайлж байгаа.
Өнөө маргаашдаа асар том худал сенсаци дэлгэж, хүмүүс түүнд анхаарч байх хооронд мөнгө тараалтаа МАН хийхэд бэлэн болсон гэдгийг ажиллаж буй хүмүүс надад мэдэгдэж байна.
Та бүхэн минь мөнгөнд битгий мөрөөдлөө худалдаарай. Мэтгэлцээндээ миний хэдэн нөхөд хурдан хүрээд ир. Сайхан бодлогоор мэтгэлцье. Учралаа би чамайг учиртайхан шиг мэтгэлцээч гэж гуйж байна" хэмээн ярилаа.
"Шударга өрсөлдөхөөс эрх баригчид айж байна. Хэт их намчирхал, ялгаварлал Монголд сайн зүйл авч ирэхгүй"
Үргэлжлүүлэн нэр дэвшигч Ц.Баатархүү "Эрх баригч намын "халаас"-ны намууд биднийг гутаан харлуулах, сонгогчдыг буруу мэдээллээр төөрөгдүүлэх зорилготойгоор үйл ажиллагаагаа явуулж байгаа.
Хэдхэн хоногийн өмнө Сүхбаатар дүүргийн байр, орц, гэр хорооллын айлуудаар энэ зургаан нэр дэвшигчийг бүү сонгоорой гэсэн агуулгатай илт гүтгэлэг явуулсан.
Энэ бол цаанаа эзэнтэй, даалгавартай зүйл. Шударга өрсөлдөх, бодлогын мэтгэлцээн явуулахаас эрх баригчид айж байна. Хэт их намчирхал, ялгаварлал Монголд сайн зүйл авч ирэхгүй.
АН сонгогчид, намуудад ажиллаж буй ухуулагч нарыг хүндэтгэн төрийн үйл хэрэгт оролцож байгаа гэж бид үзэж улс төрийн үйл ажиллагаа явуулж байна" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
48 СЭТГЭГДЭЛТЭЙ
|
