О.Баасанхүү: СЕХ-ноос лавлагаа авахад МАН-ын албан ёсны ухуулагч юм байна. Бид энэ асуудлыг ноцтойгоор хүлээн авч байгаа
Өвөрхангай аймгийн Сант сумын Ардчилсан Нам(АН)-ын дарга Б.Б-ийн амь насаа алдсан хэргийг маш ноцтой асуудал хэмээн үзэж буйгаа АН-ын Хууль эрх зүйн асуудал хариуцсан Нарийн бичгийн дарга О.Баасанхүү мэдэгдлээ.
Тус намаас өнөөдөр Цагдаагийн Ерөнхий Газар(ЦЕГ), Нийслэлийн Цагдаагийн Удирдах Газар(НЦУГ)-т дээрх хэрэгтэй холбогдуулан албан бичиг хүргүүлээд байна.
АН-ын Хууль эрх зүйн асуудал хариуцсан Нарийн бичгийн дарга О.Баасанхүү "Өвөрхангай аймгийн Сант сумын АН-ын дарга Б.Батмөнх гэж бидний журмын анд бусдын гарт аймшигтайгаар амь насаа алдлаа. e-Election сайт, Сонгуулийн Ерөнхий Хорооноос лавлагаа авахад Монгол Ардын Нам(МАН)-ын албан ёсны ухуулагч юм байна. Энэ ухуулагч нь УИХ-ын дарга Г.Занданшатарын ухуулгад ажиллаж байсан байж болзошгүй байгаа. Тиймээс энэ асуудлыг ноцтойгоор хүлээн авч байна.
ЦЕГ-ын дарга Т.Сүхболдод хүргүүлэхээр албан бичиг өгсөн. Мөн НЦУГ-т мөн шаардлага хүргүүлж байгаа юм.
Ингэхийн учир нь МАН-ын даргын зүгээс ард нийтээ турхирсан, намуудыг талцуулсан, хүмүүсийг үзэл бодол, итгэл үнэмшлээр нь ялгаварласан.
Хэрэв энэ сонгуульд ялагдах юм бол газрын зураг өөрчлөгдөнө гэсэн утгатай мэдээлэл хэлж, ялах ард түмэн нь юм бол АН-ыг ял гэсэн турхирсан шинжтэй ухуулга сурталчилгаа хийж байгаагаа зогсоогооч гэж шаардаж байна.
Сүүлийн үед тэгш бус сонгууль явж байна. Ялангуяа төр, хуулийн байгууллагууд намуудад тэгш хандахгүй байна. АН удаа дараа гомдол гаргаж байхад тухайн гомдлыг хүлээж авахгүй байна. Архангай, Увс, Ховдод болсон асуудал, мөн Улаанбаатарын зарим дүүрэгт болж байгаа асуудалд ямар ч арга хэмжээ авахгүй байгаа.
Шударга өрсөлдөөч, хүн ярихгүй хөгжил яриач, нам ярихгүй бодлого яриач гэж хүсэж байна. Тиймээс мэтгэлцээнийг өргөн хийгээч, МАН өөрсдөө санаачлаад мэтгэлцээн яагаад хийхгүй байна вэ" гэлээ.
